ទឹកចិត្តដ៏ល្អមួយរបស់ស្វាមី Nune Woranuch ធ្វើឱ្យមហាជនថៃរាប់លាន រំជួលចិត្តខ្លាំង

ប្រិយមិត្តពិតជាបានស្គាល់ហើយលោក Tod Piti ដែលអ្នកណាៗក៏ស្គាល់ថាជាសេដ្ឋីស្រាបៀសិង្ហាប្រចាំប្រទេសថៃនោះ ។ មិនតែប៉ុណ្ណោះ លោកក៏ជាស្វាមីរបស់តារាស្រីលំដាប់ជួរមុខប្រចាំប្រទេសថៃនាង Nune Woranuch ទៀតផង ។

លើសពីនេះទៅទៀត បើងាកមកមើលពីជីវិតគូអ្នកទាំងពីរវិញ ទោះបីជាអ្នកទាំងពីរមិនសូវលេចមុខនៅក្នុងបណ្តាញសង្គមជាមួយគ្នាមែនពិត តែអ្នកទាំងពីរតែងតែលេចមុខនៅក្នុងកម្មវិធីសប្បុរសធម៌ ជួយដល់ប្រជាជនខ្វះខាតជានិច្ច ហើយទង្វើល្អទាំងនេះហើយដែលទទួលបានការស្រឡាញ់ពីមនុស្សរាប់លាននាក់ ។

ដោយឡែក កាលពីពាក់កណ្តលខែកក្កដាកន្លងទៅនេះ ក្រោយពីឃើញប្រទេសជាតិកំពុងតែប្រឈមមុខនឹងជំងឺកាចសាហាវ ប្រជាជនស្លាប់បន្តកន្ទុយគ្នា ស្រាប់តែលោក Tod Piti ស្វាមីតារាស្រី Nune Woranuch បានចែករំលែកពាក្យសម្តីដែលលោកបានបង្ហោះកាលពីឆ្នាំមុនឡើងវិញថា «អាណិតប្រទេសថៃ និង ប្រជាជនថៃណាស់ ហើយឆ្នាំនេះកាន់តែធ្ងន់ធ្ងរលើសមុនទៀត» ។

បើក្រឡេកមកមើលមហាជនថៃវិញ គ្រាន់តែឃើញលោក Tod Piti បង្ហោះសារដែលបង្កប់អត្ថន័យបែបនេះភ្លាម ម្នាក់ៗមិនបង្អង់យូរឡើងនាំគ្នាចូលទៅខមមិនផ្តល់កម្លាំងចិត្តលោកព្រាត ព្រោះគិតថាលោកអាចនឹងពិបាកណាស់ហើយ ដែលត្រូវជួយប្រជាជនដែលអត់ឃ្លានក្នុងសម័យកូវីដ-១៩ ជាច្រើននាក់ ។ មួយវិញទៀត លោកត្រូវគ្រប់គ្រងបុគ្គលិកនៅក្នុងក្រុមហ៊ុនរាប់ពាន់នាក់ ទាំងដែលកំពុងជួបវិបត្តិកូវីដ-១៩ យ៉ាងធ្ងន់ធ្ងរ តែលោកបែរជាមិនបោះបង់ នៅតែជួយឈឺឆ្អាលប្រជាជនទៀត ។

បន្ទាប់ពីមហាជនចូលទៅផ្តល់កម្លាំងចិត្តហើយ លោកស្រាប់តែតបពាក្យមួយម៉ាត់ដែលធ្វើឱ្យគ្រប់គ្នាឮហើយញញឹម និង សប្បាយចិត្តតែម្តងនោះ គឺពាក្យថា «ខ្ញុំមិនអីនោះទេ ខ្ញុំអាចទប់ទល់បាន» ៕

ប្រភព៖ Khaosod