គេថាឃើញស្អាតខុសពីមុន ស្មានតែកែសម្ជស្ស ស្រាប់តែ រចនា រ៉ាវ៉ាឌី ឆ្លើយតបផាំងៗបែបនេះ

អាចនិយាយបានថា រចនា រ៉ាវ៉ាឌី គឺជាតារាសម្ដែងកំពុងពេញនិយមគួរឱ្យកត់សម្គាល់មួយរូបនៅក្នុងស្រទាប់មហាជននាពេលបច្ចុប្បន្ន ដោយសារតែនាងមិនត្រឹមតែមានទេពកោសល្យផ្នែកសិល្បៈយ៉ាងប៉ិនប្រសប់ទេ តារាស្រីរូបនេះក៏មានសម្រស់គួរឱ្យទាក់ទាញមិនធម្មតាដែរ ។

ដោយសារតែពីមួយថ្ងៃទៅមួយថ្ងៃ តារាសម្ដែង រចនា រ៉ាវ៉ាឌី តែងរំលេចខ្លួនស្រស់ស្អាតឡើងរាល់ថ្ងៃ ទាំងសម្លៀកបំពាក់ ភាពស៊ីវិល័យ ការតុបតែងខ្លួនក៏កាន់តែស្អាតប្លែកឡើង រហូតមានអ្នកឆ្ងល់ថានាងទៅវះកាត់កែកុនទៀតផង ។

រចនា រ៉ាវ៉ាឌី បានបង្ហោះសារហួសចិត្តមួយនៅលើគណនីហ្វេសប៊ុកនាពេលកន្លងមកនេះ ក្រោយមានអ្នកសួរនាងថា នាងបានទៅកែកុនកន្លែងណាខ្លះទើបស្អាតប្លែកបែបនេះ ។ គ្រាន់តែឮសំណួរនេះភ្លាម រចនា រ៉ាវ៉ាឌី បានឆ្លើយបដិសេធភ្លាមៗថា នាងចង់ផ្លាស់ប្ដូរខ្លួនឯងមិនចាំបាច់ទៅកែកុន ឬកែសម្ផស្សនោះទេ តែមានមនុស្សម្នាក់បានធ្វើឱ្យនាងផ្លាស់ប្ដូរ តែយ៉ាងណា រចនា រ៉ាវ៉ាឌី មិនព្រមបង្ហើបថា ម្នាក់នោះជានរណាឡើយ ។

ស្រីស្រស់កំពុងឡើងកូដ រចនា រ៉ាវ៉ាឌី ធ្លាប់បានរៀបរាប់ថា៖ «មានមនុស្សជាច្រើនដែលជួបខ្ញុំ ហើយសួរខ្ញុំថា ម៉េចឥលូវប្លែកច្រើនម៉្លេះ?? ទៅកែកុនកន្លែងណាខ្លះ?? ចង់ប្រាប់ទៅអ្នកទាំងអស់គ្នាថា បើចង់ផ្លាស់ប្ដូរខ្លួនឯង មិនចាំបាច់ដល់ទៅកែកុន ឬ កែសម្ផស្សទេ យើងមានភាពជឿជាក់ក្នុងការផ្លាស់ប្ដូរខ្លួនឯង ហើយចង់ផ្លាស់ប្ដូរខ្លួនឯង ដើម្បីមនុស្សដែលយើងស្រឡាញ់ និងដើម្បីខ្លួនឯង»។

តារាសម្ដែងរូបនេះបន្តថា ៖ «សម្រាប់ខ្ញុំវិញខ្ញុំអាចផ្លាស់ប្ដូរខ្លួនឯងបានប៉ុននេះ ក៏ដោយសារតែចង់ស្គាល់អ្វីដែលថ្មី ហើយគឺជាខ្លួនឯង ជាពិសេស ខ្ញុំតែងតែមានមនុស្សម្នាក់នៅពីក្រោយ ដែលតែងតែចាំផ្លាស់ប្ដូរខ្ញុំគ្រប់យ៉ាង ហើយគាត់ក៏ជាកម្លាំងជំរុញចិត្តមួយដែរ ខ្ញុំអាចផ្លាស់ប្ដូរខ្លួនឯងបានដល់ពេលនេះក៏ព្រោះតែ….នោះគឺអត់ប្រាប់ទេទុកឱ្យឆ្ងល់» ៕