ស្តាប់ចម្រៀង ស៊ូលី ផេង យូរៗ អ្នកគាំទ្រដាក់ងារជាតារាចម្រៀង Sad ឥតស្រាកស្រាន្ត

រយៈពេលប្រមាណជា ៥ ឆ្នាំ ក្នុងការចាប់ផ្តើមហក់ចូលក្នុងវិស័យសិល្បៈរបស់តារាចម្រៀង និង អ្នកនិពន្ធ Original Song ស៊ូលី ផេង ហាក់ទទួលបានការគាំទ្រយ៉ាងសម្បើមពីសំណាក់មហាជនអ្នកគាំទ្រ ជាពិសេសយុវវ័យដែលចូលចិត្តស្តាប់បទចម្រៀងនិពន្ធថ្មីតែម្តង ។ ម្យ៉ាងវិញទៀត បទចម្រៀងប្រមាណជាជាង ១០ បទ របស់តារាចម្រៀងរូបនេះ គឺសុទ្ធសឹងតែមានការពេញនិយម និង រក្សាប្រជាប្រិយភាពបានយូរផងដែរ ។

អាចចាត់ទុកថាជាតារាចម្រៀងជំនាន់ថ្មី លោក ស៊ូលី ផេង អាចឈរក្នុងលំដាប់តារាចម្រៀង និង អ្នកនិពន្ធ Original ដែលមានប្រជាប្រិយភាព និង បទចម្រៀងរបស់លោកគឺគ្រប់បទសុទ្ធសឹងតែទទួលបានការគាំទ្រយ៉ាងខ្លាំង ដោយគេបានសង្កេតឃើញមិនថាតែនៅក្នុង ហ្វេសប៊ុក ឬ យូធូប នោះទេ បទចម្រៀងតារាប្រុសរូបនេះមានអ្នកចូលស្លាប់ និង អ្នកចូលទស្សនារាបរយម៉ឺននាក់ ។

អ្វីដែលកាន់តែធ្វើឱ្យអ្នកគាំទ្រកាន់តែស្គាល់រូបលោក និង និយមស្តាប់បទរបស់លោកកាន់តែច្រើនទៀតនោះ ក៏ព្រោះបទចម្រៀងរបស់លោក ស៊ូ លីផេង ទាំងអស់គឺសុទ្ធសឹងតែជាបទបែបមនោសញ្ចេតនា ទុក្ខសោក ពាក់ព័ន្ធនឹងស្នេហាមិនសមប្រកកប ពោលគឺជាបទ Sad ទាំងអស់តែម្តង ។ បទរបស់ ស៊ូ​ លីផេង បកស្រាយពាក្យពេចន៍គ្រប់ឃ្លា នៃអត្ថន័យបទចម្រៀងច្រៀងដោយតារាចម្រៀងរូបនេះ ធ្វើឱ្យអ្នកស្តាប់ហើយស្រក់ទឹកភ្នែក ក៏ព្រោះភាគច្រើនអត្ថន័យគឺសុទ្ធសឹងតែជារឿងស្រដៀងនឹងរឿងរ៉ាវពិតរបស់យុវវ័យមួយចំនួន ៕