ទោះប្រាក់ចំណូលធ្លាក់សម័យកូវីដ តែតារាស្រី រ៉ាប៊ី មិនភ័យរឿងមួយនេះសោះ!
មិនខុសពីមិត្តភក្តិដទៃឡើយក្នុងរយៈពេលកូវីដ-១៩ រាលដាលបែបនេះ តារាចម្រៀងរូបស្រស់ស្អាត រ៉ាប៊ី ក៏មានការប៉ះពាល់ចំពោះប្រាក់ចំណូលរបស់ខ្លួនដែរ ប៉ុន្តែយ៉ាងណានាងហាក់មិនសូវខ្វល់ខ្វាយប៉ុន្មានឡើយ ។
ក្រៅពីបង្ហាញវត្តមាននៅក្នុងកម្មវិធីប្រគំតន្ត្រីនៅតាមស្ថានីយទូរទស្សន៍នានា រ៉ាប៊ី បានសម្រេចផ្អាកការថតស្ប៉តពាណិជ្ជកម្ម ក៏ដូចជា MV បទចម្រៀងមួយរយៈ ព្រោះមិនចង់ហ៊ានប្រថុយនៅក្នុងកំលុងពេលនេះ ។ បើទោះបីជាទទួលស្គាល់ពីការធ្លាក់ចុះនៅក្នុងប្រាក់ចំណូលក្តី តែ រ៉ាប៊ី ហាក់មិនសូវភ័យព្រួយប៉ុន្មានឡើយ ព្រោះមិនមានជាប់បំណុលធនាគារដូចគេ ។ បើតាមប្រភពដែលស្និទ្ធជាមួយតារាចម្រៀងរូបស្រស់ម្នាក់នេះបានឱ្យដឹងថា មិនថារថយន្ត ផ្ទះវីឡា ឬ ដីធ្លីអ្វីទេ រ៉ាប៊ី មិនបានទិញបង់រំលោះឡើយពោលគឺនាងឱ្យដាច់ៗតែម្តង ដូច្នេះមិនសូវជាបញ្ហាសម្រាប់នាងក្នុងពេលមានបញ្ហាបែបនេះឡើយ ។
គេចាំបានថាកន្លងមក រ៉ាប៊ី ក៏មានគម្រោងបើកហាងលក់ផលិតផលរក្សាសម្រស់ដែលនាងគ្រោងនឹងយកមកពីប្រទេសកូរ៉េដែរ តែត្រូវជាប់គាំងទៅវិញដោយសារកូវីដ-១៩ ផ្ទុះខ្លាំង ។ មិនមែនជាតារាលំដាប់ Grade A តែ រ៉ាប៊ី ក៏ជាតារាដែលមានជីវភាពរស់នៅហាយសូរមិនធម្មតា ដោយនាងរស់នៅក្នុងផ្ទះវីឡាដ៏ស្រស់ស្អាតមានរថយន្តទំនើបជិះដល់ទៅបីគ្រឿងទៀតផង ៕
