សុខៗ នាយព្រែក ទម្លាយរឿងហួសចិត្តមួយទាក់ទងនឹងតារាជើងចាស់ អម្ពរ ទេវី

តារាកំប្លែង នាយព្រែក ដែលជាឈាមជ័របង្កើតរបស់សិល្បការិនីជើងចាស់ អ្នកស្រី នួន សារី ហៅ យាយយ៉យ បច្ចុប្បន្នកំពុងបន្តដំណើរលើវិថីសិល្បៈយ៉ាងរលូន និង ក្លាយជាពិធីករដ៏មានប្រជាប្រិយភាពមួយរូប តាមរយៈសំនួនវោហារកំប្លុកកំប្លែងស្ងួតរបស់លោក ធ្វើឱ្យទស្សនិកជនពេញចិត្ត ។

កន្លងមកមិនថាអ្នកនៅក្នុងរង្វង់សិល្បៈ ឬទស្សនិកជនោះទេ ភាគច្រើនសុទ្ធតែដឹងច្បាស់ថា នាយព្រែក គឺជាកូនប្រុសពៅសំណព្វចិត្តរបស់តារាចម្រៀងអាយ៉ៃដ៏ល្បី យាយយ៉យ ហើយលើសពីនេះ ម្ដាយកូនអ្នកទាំងពីរតែងដឹកដៃគ្នាចូលរួមកម្មវិធីបង្ហាញពីទំហំនៃក្ដីស្រឡាញ់រវាងគ្នា ធ្វើឱ្យទស្សនិកជនរំភើបចិត្តរហូតស្រស់ទឹកភ្នែកជាច្រើនលើកច្រើនសា ។

ដោយឡែកស្រាប់តែថ្មីៗនេះ នាយព្រែក បានទម្លាយរឿងកាលពីនៅក្មេងមួយដែលមានជាប់ទាក់ទងនឹងតារាសម្ដែងជើងចាស់ អម្ពរ ទេវី ដែលធ្វើឱ្យអ្នកលេងបណ្ដាញសង្គមភ្ញាក់ផ្អើលផង អស់សំណើចដោយហួសចិត្តផង ដោយ នាយព្រែក បានបង្ហោះរូបថតនៅពីតូចមួយសន្លឹក ព្រមទាំងសរសេររៀបរាប់លើហ្វេសប៊ុក «កាលពីតូចទៅណាក៏គេច្រឡំថាខ្ញុំកូនអ្នកមីង អម្ពរ ទេវី ដែរ អត់មានថាដូចម៉ែយ៉យសោះ» ។

ក្រោយការបង្ហោះរបស់ នាយព្រែក ក៏មានមហាជនជាច្រើនបញ្ចេញយោបល់លេងសើចក្នុងន័យហួសចិត្ត ព្រោះថា នាយព្រែក ប្រហែលជាចង់លើកសរសើរខ្លួនឯងកាលពីក្មេង មានមុខមាត់ស្អាតដូចអ្នកនាង អម្ពរ ទេវី ៕