ខឹងពេក! អតីតកីឡាកាស Bautista ត្រៀមឱ្យលុយ ២ ម៉ឺនដុល្លារ ដល់អ្នករកឃើញជនឆូតឈ្មោះ «Trump» លើសត្វ
អតីតតារាកីឡាកាស និងតួអង្គប្រចាំរឿង «Guardians of the Galaxy» លោក Dave Bautista បានផ្ដល់រង្វាន់ជាទឹកប្រាក់ចំនួន ២ ម៉ឺនដុល្លារ ទៅដល់នរណាដែលអាចចាប់ខ្លួនជនបង្កដែលបានឆូតឈ្មោះ «Trump» លើដងខ្លួនសត្វសមុទ្រ manatee ។
នៅចុងសប្ដាហ៍មុននេះ ព័ត៌មានដ៏រន្ធត់មួយត្រូវបានផ្សព្វផ្សាយ ក្រោយសត្វ manatee មួយត្រូវបានថតជាប់ជាមួយនឹងពាក្យ «Trump» ឆូតលើខ្នងរបស់វា ។ សត្វសមុទ្រមួយនេះ ត្រូវបានរកឃើញកាលពីថ្ងៃអាទិត្យ ទី ១០ ខែមករា ឆ្នាំ ២០២១ ក្នុងទន្លេ Homosassa នៃរដ្ឋ Florida។
ខណៈរបួសនៃសត្វសមុទ្រមួយនេះមិនសូវមានសភាពធ្ងន់ធ្ងរ ខាងមន្ត្រីក្នុងតំបន់ក៏បានចេញការស៊ើបអង្កេតរកជនដៃដល់ រួមទាំងប្រកាសផ្ដល់ប្រាក់រង្វាន់ចំនួន ៥ ពាន់ដុល្លារផងដែរ សម្រាប់អ្នកដឹងព័ត៌មានទាក់ទងនឹងជនបង្ករបួសស្នាមលើសត្វសមុទ្រមួយនេះ។ តាមរបាយការណ៍ជឿជាក់ថា ស្នាមឆ្នូតលើខ្លួនសត្វសមុទ្រមួយនេះ គឺមិនបានឆូតដាច់ស្បែករបស់វាឡើយ ប៉ុន្តែឆូតលើស្លែដែលជាប់លើខ្នងវា។
ក្រោយការប្រកាសស្វែងរករបស់ប៉ូលិសនេះ លោក Bautista ក៏បានផ្ដល់ប្រាក់រង្វាន់គុណនឹង ៤ ដងនៃប្រាក់រង្វាន់របស់ប៉ូលិស ដើម្បីជួយក្នុងការតាមរកជនដៃដល់បានកាន់តែឆាប់៕
ប្រភព៖ Unilad
