រិះគន់ពេកឥលូវ វីតា ចេញមុខនិយាយច្បាស់ៗរឿងច្រៀងបទ «មុនអូនមានប្ដីបងនៅឯណា»
នៅលើប៉ុន្មានសង្គមហ្វេសប៊ុកប៉ុន្មានថ្ងៃចុងក្រោយនេះ គេសង្កេតឃើញមានមហាជនជាច្រើនបាននាំគ្នាចែករំលែក បទ ចម្រៀង Cover មួយបទក្រោយចំណងជើង «មុនអូនមានប្ដីបងនៅឯណា» តៗគ្នាព្រោងព្រាត ដែលក្នុងនោះ មានមហាជនមួយចំនួនបានបញ្ចេញយោបល់រិះគន់ធ្ងន់ៗទៅលើអ្នកចម្រៀង ដោយពួកគេយល់ថា បទចម្រៀងនេះ បន្ទាបតម្លៃស្រ្តី នាំឱ្យខូចខាតកិត្តិយសជាស្រ្តីថ្លៃថ្នូរដែលបានរៀបការមានស្វាមីរួចហើយ បែរទៅទាក់ទងនឹងបុរសផ្សេងទៀត។
ការរយៈវីដេអូកិច្ចសម្ភាសផ្ទាល់លើទំព័រផេក សិល្បករកម្ពុជា តារាចម្រៀងវ័យ ២៥ ឆ្នាំ កញ្ញា វីតា បានសូមទោសទៅកាន់ទស្សនិកជនទាំងអស់ តែយ៉ាងណានាងបានចេញមុខបកស្រាយថា បទចម្រៀងខាងលើមានបង្កប់អត្ថន័យផ្សេង គឺក្នុងកំឡុងពេលនាងជាប្រពន្ធកំពុងមានស្វាមីនោះ នាងមិនបានផិតក្បត់ស្វាមីទៅទាក់ទងបុរសណាម្នាក់នោះទេ គ្រាន់តែក្នុងជីវិតអាពាហ៍ពិពាហ៍នោះ បុរសជាប្ដីមិនបានបំពេញតួនាទីជាស្វាមីល្អ ដូចជាដើរលេង ឬធ្វើអំពើហិង្សាណាមួយដាក់ប្រពន្ធជាដើម រហូតដល់ពេលនាងជាប្រពន្ធបានជួបបុរសក្រោយ ដែលមានចំណុចល្អច្រើនជាងស្វាមីខ្លួន ទើបនាងនឹកគិតក្នុងចិត្តថា មុនពេលអូនមានប្ដីបងនៅឯណា ។
ម្យ៉ាងវិញទៀត វីតា ក៏បានរៀបរាប់បន្ថែមថា បទចម្រៀងមួយបទនេះ មិនមែននៅសុខៗនាងក៏នឹកឃើញច្រៀងឡើងនោះទេ ពោលគឺនាងគ្រាន់តែច្រៀង Cover ពីបទចម្រៀងម្ចាស់ដើមគឺ នាយចឺម ប៉ុណ្ណោះ។ បើនិយាយដល់មូលហេតុដែលធ្វើឱ្យនាងសម្រេចចិត្ត Cover បទចម្រៀងមួយបទនេះ ក៏ព្រោះតែនាងស្រឡាញ់សាច់ភ្លេងបទនេះ ពិសេសនាងបានលើកឡើងថា សិល្បៈនៃការច្រៀង នាងយល់ថាវាក៏មិនប៉ះពាល់ខ្លាំងដូចអ្នកលេងហ្វេសប៊ុកមួយចំនួនតូចបានបញ្ចេញយោបល់ក្នុងន័យថា ហាក់មិនលើកតម្កើងតម្លៃដល់ស្ត្រី ដែលបណ្ដាលឱ្យមានអំពើហិង្សាកើតឡើងនោះដែរ៕