ថ្មីៗនេះ ប្រធានបទនៃការសម្រេចរបស់ក្រសួងអប់រំ យុវជន និងកីឡា បានប្រកាសជាផ្លូវការថាសិស្សថ្នាក់ទី ១២ ទូទាំងប្រទេស បានកំណត់ឱ្យជាប់ជាស្ថាពរហើយ ចំពោះបេក្ខជនទាំងអស់ដែលបានចុះឈ្មោះ ដោយគ្មានកំណត់និទ្ទេសឡើយ ។ នេះបើតាមសេចក្តីប្រកាសកាលពីថ្ងៃទី ១៦ ខែធ្នូ ឆ្នាំ២០២០ ដោយឡើងក្រោមអនុសាសន៍ដ៏ខ្ពង់ខ្ពស់ របស់សម្ដេចតេជោ ហ៊ុន សែន នាយករដ្ឋមន្ត្រីកម្ពុជា ដែលបានថ្លែងសន្ទរកថាកាលពីថ្ងៃទី ១៥ ធ្នូ ២០២០ កន្លងទៅនេះ ។
ជុំវិញការប្រកាសខាងលើនេះដែរ មានមហាជនអ្នកលេងបណ្តាញសង្គម ជាពិសេសសិស្សថ្នាក់ទី ១២ ជាច្រើនបានរំភើបចិត្តយ៉ាងខ្លាំង ក្រោយពីលទ្ធផលបាក់ឌុបរបស់ខ្លួនបានជាប់យ៉ាងដូច្នេះ ។
ក្នុងនោះ បើក្រឡេកទៅមើលក្មួយប្រុសបង្កើត របស់ពិធីករល្បីឈ្មោះ លោក ជា វណ្ណារិទ្ធ មានឈ្មោះក្នុង fb ថា « Sal Rc »ក៏បានបង្ហោះសារមួយឃ្លាទទួលបានការចាប់អារម្មណ៍យ៉ាងខ្លាំងដូចគ្នា ពីជុំវិញនៃការជាប់សម័យប្រឡងបាក់ឌុបក្នុងឆ្នាំ ២០១៩-២០២០ របស់ខ្លួន ដូចជាហាក់ខកចិត្តបន្តិចក្នុងការប្រឡងដើម្បីដឹងសមត្ថភាពរបស់ខ្លួន ។ សារនោះក្មួយប្រុសពិធីកររូបនោះពោលថា «ទោះបីជាមិនបានប្រឡង ប៉ុន្តែខ្ញុំនៅតែសប្បាយចិត្ត ហើយក៏អរគុណខ្លួនឯងនូវរាល់ការខិតខំប្រឹងប្រែងរយៈពេល ១ ឆ្នាំកន្លងមកនេះ» ។
សារនោះដែរ បានធ្វើឲ្យមហាជនអ្នកលេងបណ្តាញសង្គមជាច្រើន ហាក់ចាប់អារម្មណ៍ និង សរសើរនូវឧត្តមគតិរបស់ក្មួយប្រុសលោក ជា វណ្ណារិទ្ធ ថាពិតជាសិស្សគំរូ និង អ្នកលេងបណ្តាញ fb បានចម្លងយកទៅសរសេរតៗគ្នាទៀតផង ៕
