កែវ ពេជ្រពិសី នៅរារែកក្នុងការរៀបការជាលើកទីពីរ ព្រោះមូលហេតុនេះ!

ដោយសារតែធ្លាប់ពើបប្រទះនូវជីវិតអាពាហ៍ពិពាហ៍មិនសមបំណងម្តងរួចមកទើបធ្វើឱ្យតារា សម្តែង កែវ ពេជ្រពិសី ហាក់រារែកនូវក្នុងការសាងជីវិតគូជាថ្មី បើទោះនាងសារភាពថាមាន ម្ចាស់ចិត្តក៏ពិតមែន តែពេលនេះនាងសុំលាក់សិនព្រោះមិនទាន់ច្បាស់លាស់នៅឡើយ។

គេចាំបានថា កែវ ពេជ្រពិសី ធ្លាប់រៀបការយ៉ាងអធិកអធមកាលពីឆ្នាំ ២០១០ ជាមួយបុរសម្នាក់ជាអណិកជនរស់នៅប្រទេសអូស្ត្រាលី តែមិនបានប៉ុន្មានផង អ្នកទាំងពីរក៏ចែកផ្លូវគ្នាទៅវិញ។ ពេលនេះដែរ អតីតស្វាមីរបស់ កែវ ពេជ្រពិសី ក៏រៀបការភរិយាថ្មីហើយដែរ ដោយឡែក កែវ ពេជ្រពិសី ឯណេះវិញ នៅតែមិនទាន់ហ៊ានសម្រេចរៀបការជាលើកទីពីរ បើទោះបីមានការបញ្ជាក់ថានាងមាន គូស្នេហ៍ទៅហើយក្តី។

អ្វីដែលចាប់អារម្មណ៍សូម្បីតែបណ្តើរចូលរួមនៅក្នុងកម្មវិធី មិត្តភក្តិក៏នាងមិនទាន់ហ៊ាននោះដែរ។ សម្រាប់ឆ្នាំនេះ កែវ ពេជ្រពិសី មានវ័យ ៣៨ ឆ្នាំ ហើយបើតាមចិត្តនាង ក៏ចង់រៀបការមានកូនភ្លាមៗ ដូចគេឯងដែរ តែចិត្តមួយនៅរារែកចិត្ត ព្រោះចង់ពិនិត្យឱ្យបានល្អិតល្អន់ កុំឱ្យមានបញ្ហាជាលើកទីពីរទៀត។

សូមបញ្ជាក់ថា ដោយសារតែស្ងប់ស្ងាត់នៅក្នុងអាជីពសិល្បៈ កែវ ពេជ្រពិសី ក៏បានងាកមកពង្រឹងការងារជំនួញរបស់នាងដែលមានដូចជាសម្អាងការ សាឡន និង លក់ផលិតផលរក្សាសម្រស់ ដែលកំពុងដំណើរការល្អប្រសើរផងដែរ។ បើនិយាយពីការវិលចូលវិស័យសិល្បៈវិញ កែវ ពេជ្រពិសី មិនខុសពី សឿ សុធារ៉ា ទេ ដោយហេតុថានាងបានអះអាង ថានឹងព្រមទទួលសម្តែងមិនថាជាតួឯក ឬ តួម្តាយឡើយ សំខាន់ឱ្យតែមានសាច់រឿងលេង៕

រូបថត ៖ ហ្វេសប៊ុក