ក្រោយសម្រាលកូនទីពីរ អតីតពិធីការិនី មួយ មួយ កាន់តែលេងខ្លួនឡើងខ្ញង់!
បើទោះបីជាចាកចេញពីអាជីពសិល្បៈជាច្រើនឆ្នាំ តែអតីតពិធីការិនី មួយ មួយ នៅតែទទួលបានការចាប់អារម្មណ៍ពីសំណាក់អ្នកគាំទ្រ ដោយសារជារឿយៗ នាងតែងបង្ហាញពីសកម្មភាពក៏ដូចជារូបភាពដ៏ស្រស់ស្អាត នៅតាមបណ្តាញសង្គម ហើយសព្វថ្ងៃនេះដែរ មួយ មួយ បានក្លាយជាអ្នកម្តាយរបស់កូនពីរនាក់ទៅហើយ ។
ឈប់ប្រឡូកសិល្បៈក៏ពិតមែនតែ មួយ មួយ នៅតែបង្ហាញវត្តមាននៅក្នុងកម្មវិធីរបស់មិត្តភក្តិមិនដែលបាត់មុខនោះទេ អ្វីដែលចាប់អារម្មណ៍ មួយ មួយ នៅតែស្រស់ស្អាតមិនប្រែប្រួលបើទោះនាងមានកូនដល់ទៅពីរនាក់ក៏ដោយ។
ជាក់ស្តែងគ្រាន់តែកូនទីពីររឹងដៃរឹងជើងភ្លាម អតីតពិធីការិនីរូបនេះ ចាប់ផ្តើមងាកមកថែសម្រស់សម្រករាង ដែលពេលនេះសម្រស់របស់នាងនៅតែខ្ញង់ស្អាតមិនចាញ់មិត្តរួមអាជីព ដំណាលៗរូបនាងឡើយ ។ ខ្លះលើកឡើងថា អ្នកម្តាយសម័យពិតជាមិនធម្មតាក្រមុំល្មមៗសុំចាញ់ហើយ ។
គួរឱ្យដឹងថា មិនខុសពីតារាមួយចំនួននៅក្នុងសិល្បៈប៉ុន្មានឡើយ មួយ មួយ មិនដែលទម្លាយមុខមាត់របស់ស្វាមីឡើយ បើទោះនាងមានកូនៗទៅហើយក្តី តែយ៉ាងណាពេលនេះ នាងកំពុងរស់នៅយ៉ាងមានក្តីសុខក្នុងជីវភាពធូរធារលុយចាយពេញៗដៃ។ បន្ថែមពីលើនេះ អតីតពិធីការិនីរូបនេះ ក៏ងាកមកពង្រីកមុខរបរលក់ចំណីអាហារនៅតាមអនឡាញជាច្រើនមុខផងដែរ៕