ជិតមានដំណឹងល្អហើយ សុខ សោម៉ាវត្តី និង លី វ៉ាហេទ ពាក់ចិញ្ចៀនគូរួមគ្នា
ភ្លេចៗត្រចៀក តារាសម្ដែងស្រីរូបស្រស់ សុខ សោម៉ាវត្តី និង កំលោះសង្ហាជាកីឡាករបាល់ទាត់ឆ្នើម លី វ៉ាហេទ បានទាក់ទងស្រឡាញ់គ្នារយៈពេល ៤ ឆ្នាំហើយ ដោយគ្រាន់តែបើកភ្នែកដល់ថ្ងៃគម្រប់ខួបស្រឡាញ់គ្នាភ្លាម សុខ សោម៉ាវត្តី បានបង្ហោះរូបថតគូស្វីតមួយសន្លឹក ព្រមជាមួយសារផ្អែមល្ហែមដូចទឹកឃ្មុំខែប្រាំង ។
ក្ដីស្នេហ៍ស្អិតល្មួតផ្អែមល្ហែមដូចស្ករតាំងម៉ែរបស់អ្នកមេម៉ាយសាច់ខ្ចី សុខ សោម៉ាវត្តី និង កីឡាករបាល់ទាត់ខាងលើ បានធ្វើឱ្យមហាជនសង្ស័យថា អ្នកទាំងពីរប្រហែលជាអាចនឹងមានដំណឹងល្អឆាប់ៗមិនខាន ព្រោះថានៅក្នុងថ្ងៃខួបស្រឡាញ់គ្នាគម្រប់ ៤ ឆ្នាំនេះ ប្រុសស្អាត លី វ៉ាហេទ បានជូនកាដូចិញ្ចៀនគូស្នេហ៍ដ៏ស្រស់ស្អាតដល់មិត្តស្រីជាទីស្រឡាញ់ ពាក់នៅនឹងម្រាមនាងដៃ ដែលមើលទៅប្រៀបដូចជាចិញ្ចៀនភ្ជាប់ពាក្យរបស់ពួកគេទាំងពីរអ៊ីចឹង ។
ទន្ទឹមនឹងការសង្ស័យពីមហាជននេះដែរ កន្លងមកតារាសម្ដែង សុខ សោម៉ាវត្តី ក៏ធ្លាប់បានបង្ហើបខ្លះៗនៅលើបណ្ដាញសង្គម ដែលខ្លឹមសាររបស់នាងហាក់ដូចជាមានចេតនាបង្ហាញថា ព្រោះតែការរីករាតត្បាតនៃវីរុសកូវីដ ១៩ ទើបធ្វើឱ្យអាកខានថ្ងៃមង្គលរបស់ពួកគេទាំងពីរ ៕