បើនិយាយដល់សិល្បៈទម្រង់បុរាណ ពិសេសរបាំព្រះរាជទ្រព្យ កន្លងមកប្រិយមិត្តបានជ្រាបខ្លះមកហើយពីវត្តមានអ្នកគ្រូសាស្ត្រាចារ្យមួយចំនួន មានដូចជា អ្នកគ្រូ ប៉ែន សុខហួន អ្នកគ្រូ សុត សុម៉ាលី អ្នកគ្រូ វ័ន សាវ៉ៃ និង អ្នកគ្រូៗជើងចាស់ជាច្រើនរូបទៀត ដែលពោរពេញដោយបទពិសោធខ្ពស់។
ថ្ងៃនេះ យើងនឹងលើកបង្ហាញពីវត្តមានអ្នកគ្រូសាស្ត្រាចារ្យដ៏ជំនាញមួយរូបទៀត ដែលអ្នកគ្រូត្រូវបានគេស្គាល់ថាជាអ្នកបន្តវេនរបស់លោកយាយទេពនាដនិម្មិត ឯម ធាយ មរតកមនុស្សរស់នៃព្រះរាជាណាចក្រកម្ពុជា នោះគឺអ្នកគ្រូសាស្រ្តាចារ្យវីរសិល្បការិនី ថោង គឹមអាន រហស្សនាម អ្នកគ្រូព្រាប។
ពិតណាស់ អ្នកគ្រូសាស្រ្តាចារ្យវីរសិល្បការិនី ថោង គឹមអាន ឬ អ្នកគ្រូព្រាប គឺជាកូនស្រីបង្កើតរបស់លោកយាយទេពនាដនិម្មិត ឯម ធាយ មរតកមនុស្សរស់នៃព្រះរាជាណាចក្រកម្ពុជា ដែលអ្នកគ្រូជាអ្នកស្នងមរតកដ៏មហាសាលបន្តពីអ្នកម្តាយក្នុងឯកទេសតួយក្ស និង តួនាយរោង នៃទម្រង់របាំព្រះរាជទ្រព្យ។
មិនត្រឹមតែជំនាញក្នុងតួយក្ស និង នាយរោងនៃទម្រង់របាំព្រះរាជទ្រព្យនោះទេ អ្នកគ្រូព្រាប ក៏ចេះដឹងខាងផ្នែកក្បាច់យក្សក្នុងទម្រង់ល្ខោនខោលទៀតផង។ អ្នកគ្រូគឺជាតួយក្សយ៉ាងសង្ហាក្រអាញមួយអង្គក្នុងចំណោមតួឯកជាច្រើនផ្សេងទៀត ក្នុងរជ្ជកាលសម្តេច ព្រះមហាក្សត្រិយានី ព្រះមាតាសិល្បៈជាតិ។
បច្ចុប្បន្ន បើទោះជាវ័យកាន់តែចាស់ក្ដី ប៉ុន្តែអ្នកគ្រូសាស្រ្តាចារ្យវីរសិល្បការិនី ថោង គឹមអាន ឬ អ្នកគ្រូព្រាប ក៏នៅតែបន្តការបង្ហាត់បង្រៀនផ្ទេរចំណេះខាងផ្នែករបាំព្រះរាជទ្រព្យនេះជូនដល់កូនខ្មែរជនាន់ក្រោយយ៉ាងសកម្ម ដែលនេះស្តែងឱ្យឃើញពីការខិតខំ និង ចូលរួមយ៉ាងសំខាន់ក្នុងការលើកស្ទួយវប្បធម៌ជាតិខ្មែរឱ្យកាន់តែរឹងមាំ និង គង់វង្សបន្តទៀត៕
