ជនជាតិចិនជិត ១០០ នាក់ លើយន្តហោះចំនួន ២ ទៅប្រទេសអ៊ីតាលី រកឃើញឆ្លងកូវីដ-១៩
អ្នកដំណើរចំនួន ៩៧ នាក់ ក្នុងចំណោម ២១២ នាក់នៃជើងហោះហើរចំនួន ២ ចេញពីប្រទេសចិន ទៅកាន់ទីក្រុង Milan ប្រទេសអ៊ីតាលី ក្នុងសប្ដាហ៍នេះ ត្រូវបានតេស្តរកឃើញវិជ្ជមានវីរុសកូវីដ-១៩ ដែលធ្វើឱ្យប្រទេសអ៊ីតាលី ត្រូវចេញវិធានការរឹតបណ្ដឹងលើអ្នកដំណើរបរទេសចូលស្រុក។
ជើងហោះហើរចំនួន ២ ចេញពីប្រទេសចិននៅថ្ងៃទី ២៦ ខែធ្នូ ឆ្នាំ ២០២២ បានចុះចតដល់ព្រលានយន្តហោះ Malpensa ទីក្រុង Milan ប្រទេសអ៊ីតាលី។ នៅជើងហោះហើរទី ១ អ្នកដំណើរចំនួន ៣៥ នាក់ក្នុងចំណោមអ្នកដំណើរសរុប ៩២ នាក់ បានរកឃើញឆ្លងកូវីដ-១៩ ខណៈជើងហោះហើរទី ២ អ្នកដំណើរ ៦២ នាក់ ក្នុងចំណោមអ្នកដំណើរសរុប ១២០ នាក់ បានរកឃើញឆ្លងវីរុសនេះដូចគ្នា។
បច្ចុប្បន្ន អ្នកដំណើរដែលកើតកូវីដ-១៩ ត្រូវបានដាក់ឱ្យធ្វើចត្តាឡីស័ក ស្របពេលអាជ្ញាធរប្រទេសអ៊ីតាលី កំពុងតាមដានលើអ្នកដែលប៉ះពាល់អ្នកជំងឺ។
ក្រោយរកឃើញករណីឆ្លងដ៏ច្រើនចូលក្នុងប្រទេស ខាងរដ្ឋមន្ត្រីក្រសួងសុខាភិបាលប្រទេសអ៊ីតាលី ក៏បានដាក់ចេញវិធានការភ្លាមដូច្នេះថា ៖«រាល់អ្នកដំណើរមកពីប្រទេសចិនទៅ ឬ ឆ្លងកាត់ប្រទេសអ៊ីតាលី នឹងត្រូវការធ្វើតេស្តរកវីរុសកូវីដ-១៩ ជាមុន។ វិធានការនេះ គឺចាំបាច់ក្នុងការធានាពីសុវត្ថិភាព និង ការពារពីវីរុសបំប្លែងខ្លួនថ្មីណាមួយឆ្លងលើពលរដ្ឋអ៊ីតាលី»។
គួរបញ្ជាក់ផងដែរថា ក្រៅពីប្រទេសអ៊ីតាលី បណ្ដាប្រទេសមួយចំនួនទៀតរួមមាន សហរដ្ឋអាមេរិក ជប៉ុន ឥណ្ឌា និង ម៉ាឡេស៊ី កាលពីពេលថ្មីៗកន្លងទៅ ក៏បានប្រកាសដាក់ចេញវិធានការតឹងរឹងលើអ្នកដំណើរដែលមកពីប្រទេសចិនដូចគ្នាផងដែរ៕
