អង្គការ WHO៖ ជំងឺកូវីដ-១៩ ជិតរលាយផុតពីពិភពលោកហើយ នៅពេលដ៏ខ្លីខាងមុខ
ប្រធានអង្គការសុខភាពពិភពលោក Tedros Adhanom Ghebreyesus បាននិយាយថា ចំនួនករណីស្លាប់ដោយជំងឺកូវីដ-១៩ ទូទាំងពិភពលោក ក្នុងរយៈពេលប៉ុន្មានសប្ដាហ៍នេះ បានធ្លាក់ចុះខ្លាំង គិតតាំងពីខែមីនា ឆ្នាំ ២០២០ មក ដោយនេះមានន័យថា ជំងឺរាតត្បាតជាសកល កូវីដ-១៩ អាចនឹងរលាយបាត់សូន្យឈឹងនៅពេលដ៏ខ្លីខាងមុខ។
តាមសម្ដីរបស់លោក Tedros Adhanom Ghebreyesus បាននិយាយថា ៖«កាលពីសប្ដាហ៍មុន ចំនួនករណីស្លាប់ដោយកូវីដ-១៩ ប្រចាំសប្ដាហ៍ គឺបានធ្លាក់ចុះខ្លាំង គិតតាំងពីខែមីនា ឆ្នាំ ២០២០ មក។ ពួកយើងគឺឈានដល់ពេលវេលាល្អមួយហើយក្នុងការបញ្ចប់នៅជំងឺរាតត្បាតជាសកលនេះ»។
ប្រធានអង្គការសុខភាពពិភពលោករូបនេះ បានអំពាវនាវដល់បណ្ដាសហគមន៍នានាលើសកលលោក ឱ្យខិតខំប្រឹងប្រែងបន្ថែមទៀត ដើម្បីប្រយុទ្ធប្រឆាំងនឹងការរាលដាលឆ្លងជំងឺនេះ។ លោកបានបន្ថែមថា ៖«ប្រសិនបើយើងមិនឆក់យកឱកាសឥលូវនេះទេ ពួកយើងនឹងប្រឈមនឹងការប្រែប្រួល ការស្លាប់កាន់តែច្រើន ហើយការរំខានអស្ថិរភាពក៏កាន់តែកើតមាន ដូច្នេះហើយចូរចាប់យកឱកាសមួយនេះកុំឱ្យរបូត»។
គួរបញ្ជាក់ថា បើតាមរបាយការណ៍ update ប្រចាំសប្ដាហ៍របស់អង្គការ WHO បានចេញផ្សាយនៅថ្ងៃទី ១៤ ខែកញ្ញា ឆ្នាំ ២០២២ កន្លងទៅ បង្ហាញថា មនុស្សជាង ៣.១ លាននាក់លើពិភពលោក បានឆ្លងកូវីដ-១៩ ក្នុងរយៈពេលប៉ុន្មានសប្ដាហ៍កន្លងទៅនេះ និងប្រមាណជា ១១ ០០០ នាក់បានស្លាប់។ ចំនួនករណីឆ្លងបានចុះថយ ២៨ ភាគរយ កាលពីមួយសប្ដាហ៍មុន ខណៈចំនួនអ្នកស្លាប់បានធ្លាក់ចុះ ២២ ភាគរយ៕
