ប្រយ័ត្នផង! កូវីដផ្ទុះភាគច្រើននៅផ្សារលក់ដូរ តាមទីប្រជុំជន ដែលពលរដ្ឋទៅទិញម្ហូប
ក្រសួងសុខាភិបាល នៅថ្ងៃទី ១៣ ខែកញ្ញា ឆ្នាំ ២០២១ នេះ បានចេញសេចក្ដីណែនាំ ស្ដីពីការបង្កើនការប្រុងប្រយ័ត្នបន្ថែម ដើម្បីការពារការចម្លងវីរុសកូវីដ-១៩ ដោយបានបញ្ជាក់ឱ្យដឹងថា ប៉ុន្មានថ្ងៃចុងក្រោយនេះ ចំនួនករណីជំងឺកូវីដ-១៩ មានការហក់ឡើងបន្តិច នៅតាមបណ្ដាខេត្តមួយចំនួននៅកម្ពុជា។
ក្នុងនោះ ក្រសួងសុខាភិបាល បានរកឃើញថា ករណីផ្ទុះជំងឺកូវីដ-១៩ ភាគច្រើន បានកើតឡើងនៅទីផ្សារលក់ដូរ ដែលមិនមែនជាផ្សារទំនើប គឺផ្សារលក់ដូរនៅតាមបណ្តាខេត្ត ក្រុង ភូមិ ទីប្រជុំជននានាជាដើម ដែលបងប្អូនប្រជាពលរដ្ឋយើង បានទៅទិញម្ហូបអាហារ និង គ្រឿងឧបភោគបរិភោគ ឬ ជួបជុំគ្នាបរិភោគ ជាដើម។
អាស្រ័យហេតុនេះ ដើម្បីធានាឱ្យបាននូវការទប់ស្កាត់ការចម្លងជំងឺកូវីដ-១៩ និង ឆ្ពោះទៅកាន់ការរស់នៅតាមបែបគន្លងប្រក្រតីភាពថ្មី ក្រសួងសុខាភិបាល បានអំពាវនាវដល់ពលរដ្ឋទាំងអស់ កុំមានអារម្មណ៍ស្កប់ស្កល់ ដោយមានការពឹងផ្អែកទាំងស្រុង ទៅលើវ៉ាក់សាំងដែលទទួលបាន ព្រោះតាមរយៈអង្គការសុខភាពពិភពលោក បានចុះផ្សាយថា ៖ «វ៉ាក់សាំងមានប្រសិទ្ធភាព ការពារយើងមិនឱ្យឈឺធ្ងន់ធ្ងរ ដែលតម្រូវឱ្យសម្រាកពេទ្យ និង កាត់បន្ថយហានិភ័យ នៃការស្លាប់ដោយសារជំងឺកូវីដ-១៩ ប៉ុន្តែលទ្ធភាពចម្លងវីរុសកូវីដ-១៩ ចំពោះបុគ្គលដែលបានចាក់វ៉ាក់សាំងរួច គឺនៅតែអាចឆ្លងបាន ប្រសិនបើបុគ្គលនោះ មិនបានអនុវត្តនូវ វិធានការបង្ការការចម្លងវីរុសកូវីដ -១៩ បានខ្ជាប់ខ្ជួនទេនោះ»៕
សូមអានសេចក្ដីលម្អិតរបស់ក្រសួងសុខាភិបាល នៅខាងក្រោមនេះ ៖