មហាជនអ្នកគាំទ្រវិស័យដើរម៉ូដ ប្រាកដជាធ្លាប់ស្គាល់មកហើយនូវប្រជាប្រិយភាពរបស់បវរកញ្ញារូបស្រស់ រាងតូចច្រឡឹង លឹម សាំងលី ដែលជាជ័យលាភីរងទី ១ បវរកញ្ញាភពផែនដី ឆ្នាំ ២០១៩។ ក្នុងនោះដែរ រយៈពេល ១ ឆ្នាំ ក្រោយនៃការទទួលបានជ័យលាភីរងទី ១ បវរកញ្ញាភពផែនដី ឆ្នាំ ២០១៩ នោះ បវរកញ្ញារូបនេះ ក៏បានបោះជំហានចូលប្រកួត Miss Universe Cambodia 2020 និង បានឈានជើងចូល Top 10 ទៀតផង។
ក្រោយការប្រកួត MUC 2020 លីម សាំងលី ក៏បានផ្អាកពីសិល្បៈមួយរយៈធំ បន្ទាប់ពីនាងបញ្ចប់ជីវិតនៅលីវ រៀបការទទួលបានកូនប្រុសស្រីចំនួន ២ នាក់។ តែយ៉ាងណាក៏ដោយ មកដល់ពេលនេះជីវិតគូរបស់អ្នកនាង ក៏បានដើរដល់ផ្លូវបំបែករួចហើយដែរ ដោយកូនប្រុសស្រីទាំង ២ របស់អ្នកនាងកំពុងរស់នៅក្នុងការមើលថែរបស់នាង។
ងាកមកកាន់ជីវិតសិល្បៈវិញ ក្រោយចាកឆ្ងាយពីសិល្បៈជាង ៣ ឆ្នាំ ថ្មីៗនេះ អ្នកនាង លីម សាំងលី បានបង្ហាញវត្តមានក្នុងវិស័យសិល្បៈជាថ្មីហើយ ដោយជារឿយៗអ្នកនាង ក៏បានបង្ហាញខ្លួនក្នុងកម្មវិធីប្រកួតបវរកញ្ញាក្នុងនាមជាតារាកិត្តិយសផងដែរ។ លើសពីនោះ ថ្មីៗនេះ អ្នកនាង លីម សាំងលី និង មិត្តរួមការងារផ្សេងទៀតបានចាប់ដៃគ្នាបង្កើតក្រុមហ៊ុនមួយឈ្មោះថា «De’ Modeling» ទៀតផង។
បន្ថែមពីនោះទៀតដែរ បើលើកយកពីសម្រស់របស់អ្នកម៉ាក់កូន ២ លីម សាំងលី មកនិយាយវិញនោះ ក្រោយពីបានបោះជំហានឈានជើងចូលវិស័យសិល្បៈជាថ្មី អ្នកនាងបានធ្វើឱ្យអ្នកគាំទ្រចាប់អារម្មណ៍យ៉ាងខ្លាំង នឹងរូបសម្រស់របស់នាង ដោយមិនប្រែប្រួលទៅណាឡើយ ពោលគឺកាន់តែស្រស់សោភាជាងកាលពេលនៅក្រមុំទៅទៀត៕
