ក្រោយកម្ពុជាបានរងការបាញ់ប្រហារពីទាហានថៃបណ្ដាលឱ្យពលរដ្ឋស្លូតត្រង់រងរបួស និង បាត់បង់ជីវិត កាលពីថ្ងៃទី ១២ ខែវិច្ឆិកា ឆ្នាំ ២០២៥ កន្លងទៅនោះ ប្រជាជនកម្ពុជាក្នុងភូមិព្រៃចាន់ ក៏បានភៀសខ្លួនចេញពីផ្ទះសម្បែងភ្លាមៗ ដើម្បីទៅរកទីតាំងជម្រកសុវត្ថិភាពបណ្តោះអាសន្នជាថ្មីម្តងទៀតហើយ។
ក្នុងនោះ ក្រឡេកមើលបណ្តាញសង្គមហ្វេសប៊ុក តាមរយៈបុគ្គលល្បីៗនៅតាមបណ្តាញសង្គម បាន និង កំពុងបន្តយ៉ាងសស្រាក់សស្រាំក្នុងការនាំយកសម្ភារសំខាន់ៗសម្រាប់ការប្រើប្រាស់ប្រចាំថ្ងៃ ដើម្បីផ្តល់ជូនជនភៀសសឹក។ ក្នុងនោះ គេបានឃើញបុគ្គលខ្លះបានចំណាយថវិកាផ្ទាល់ខ្លួន ខ្លះទៀតក៏ទទួលយកត្រឹមសម្ភារប្រើប្រាស់ពីសប្បុរជន ដើម្បីយកទៅចែកជូនបន្ត និង ខ្លះទៀតក៏បានបង្កើតមូលនិធិផងដែរ។
ជាក់ស្តែង ក្រឡេកទៅមើលអ្នកផលិតមាតិកា និង ជាអ្នកលក់អនឡាញល្បីអ្នកនាង ទីនីន ក៏បានបង្កើតមូលនិធិប្រមូលថវិកាជួយដល់ជនភៀសសឹក និង កងទ័ពជួរមុខដែរ ដោយគិតត្រឹមវេលាម៉ោង ៣ រសៀលនាថ្ងៃទី ១៤ ខែវិច្ឆិកា ឆ្នាំ ២០២៥ អ្នកនាងបានប្រកាសទទួលបានទឹកប្រាក់ជិត ២ ម៉ឺនដុល្លារហើយ។ ក្នុងនោះដែរ អំឡុងពេលទទួលបានប្រាក់ជំនួយពីសប្បុរសជន អ្នកនាង ទីនីន ក៏បានបង្ហាញពីចំណូលចំណាយនៃមូលនិធិច្បាស់ៗផងដែរ។
ងាកទៅកាន់សប្បុរសជនឯណោះវិញ ក្នុងមូលនិធិអ្នកនាង ទីនីន គេបានឃើញ សិល្បករ សិល្បការិនីជាច្រើន ក៏បានចូលរួមបរិច្ចាគថវិកាផ្ទាល់ខ្លួនជាបន្តបន្ទាប់ផងដែរ ក្នុងនោះរួមមានដូចជា អ្នកនាង ពេជ្យ សូលីកា, អ្នកនាង រ៉េត សារីតា, កញ្ញា ពេជ្យ វត្តីសារ៉ាវឌ្ឍី, បវរកញ្ញាភេទទី ៣ នៀននៀន, នាដការបាំ អាលីស, ឆាឆា និង ជាពិសេស អ្នកលក់អនឡាញល្បីៗ ព្រមទាំងមហាជនទូទៅផងដែរ៕
