លោកជំទាវ អ៊ឹង ឈីវលី ត្រូវបានគេស្គាល់ថាជាភរិយារបស់ លោក សុខ សង្វារ រដ្ឋលេខាធិការក្រសួងមុខងារសាធារណៈ និង ជាកូនប្រុសពៅ សម្ដេចវិបុលបញ្ញា សុខ អាន។ លោកជំទាវជានាយកប្រតិបត្តិ (CEO) នៃក្រុមហ៊ុន Lyly Food Industry Co., Ltd. ដែលជាក្រុមហ៊ុនផលិតនំស្រួយដ៏ជោគជ័យ និង បាននាំចេញទៅអន្តរជាតិដល់ទៅ ១២ ប្រទេស។
លោកជំទាវ អ៊ឹង ឈីវលី បានសិក្សានៅសាកលវិទ្យាល័យ Ryerson University នៅកាណាដា និង សាលាធុរកិច្ច Nottingham Trent Business School នៅចក្រភពអង់គ្លេស។ ក្រោយបញ្ចប់ការសិក្សា លោកជំទាវបានកាន់កាប់អាជីវកម្មគ្រួសារ និង លើកកម្ពស់អាជីវកម្ម ដោយប្រើរបៀបគ្រប់គ្រងឆ្ពោះទៅកាន់ស្តង់ដាអន្តរជាតិ។ ជាលទ្ធផល ផលិតផលរបស់ក្រុមហ៊ុនមានទីផ្សារនាំចេញរហូតដល់ទៅ ១២ ប្រទេស។ ក្នុងនោះរួមមាន អូស្ត្រាលី, កាណាដា, ចិន, ឥណ្ឌូនេស៊ី, អ៊ីតាលី, ម៉ាឡេស៊ី, ម៉ូរីស, មីយ៉ាន់ម៉ា, កូរ៉េខាងត្បូង, ថៃ, អាមេរិក និង វៀតណាម។
ជាមួយភាពជាអ្នកដឹកនាំ លោកជំទាវលើកឡើងថា «ក្នុងនាមជាអ្នកដឹកនាំ អ្នកត្រូវតែប្រាកដថាអ្វីៗគ្រប់យ៉ាងគឺមានតុល្យភាព។ ការផ្លាស់ប្តូរ និង ផ្តល់ឱកាសដល់បុគ្គលិករបស់យើង គឺជាកត្តាដ៏ចាំបាច់»៕
ប្រភព៖ Prestige
