បើនិយាយពីទំនាក់ទំនង និង ការរាប់អានគ្នានៅក្នុងសង្គមសិល្បៈ គេសង្កេតឃើញមានសិល្បករ សិល្បការិនីច្រើនណាស់ ដែលមិនជាប់សាច់ឈាមនឹងគ្នាទាល់តែសោះ ប៉ុន្ដែពួកគេមាននិស្ស័យ មានអត្តចរិតស្រដៀងគ្នា ហើយស្រឡាញ់រាប់អាន យកអាសាគ្នាទៅវិញទៅមកប្រៀបដូចមនុស្សក្នុងគ្រួសារតែមួយ។
ការស្រឡាញ់រាប់អាននោះទៀតសោត មិនផ្ដោតសំខាន់តែទៅលើសិល្បករដែលមានភេទដូចគ្នា តែក្នុងនោះគេឃើញមានសិល្បករជាច្រើនដែលមានភេទផ្ទុយគ្នា ពោលគឺរវាងបុរស និង ស្រ្តី ក៏រាប់អានគ្នាយ៉ាងជិតដិតដែរ។
ជាក់ស្ដែងគេសង្កេតឃើញសិល្បករ-ការិនី ២ រូប ដែលសុទ្ធសឹងជាតារាសម្ដែង គឺលោក ខាត់ សម្បត្តិ និង កញ្ញា ណាក់ ស្រីណា គិតមកដល់ពេលនេះ អ្នកទាំងពីរបានរាប់អានគ្នា ១៤ ឆ្នាំមកហើយ ក្នុងនោះទំនាក់ទំនងរបស់ពួកគេអាចនិយាយបានថាជិតដិតខ្លាំងដូចបងប្អូនបង្កើត ទាំងការមើលថែគ្នា ជួយយកអាសាគ្នា ជ្រោមជ្រែង ផ្ដល់កម្លាំងចិត្ត និង មិនទៅណាឆ្ងាយពេលដែលមិត្តល្អត្រូវការជំនួយ។
ណាក់ ស្រីណា បានរៀបរាប់ទៅកាន់មិត្តល្អថា ៖ «១៤ឆ្នាំហើយដែលពួកយើងស្គាល់គ្នា ហើយក៏មិនដែលឈ្លោះគ្នាសូម្បីម្តង នេះប្រហែលមកពីយើងមិនដែលខ្ចីលុយគ្នាចាយហើយបានចឹង» ចំណែកលោក ខាត់ សម្បត្តិ ក៏បាននិយាយទៅកាន់ ណាក់ ស្រីណា វិញថា ៖ «ពេលវេលាអាចប្រែប្រួលទៅមុខ តែមិត្តភាពជាមួយមិត្តម្នាក់នេះតាំងពីថ្ងៃចាប់ផ្តើម ដល់ថ្ងៃនេះទាំងវាចា កាយ និងចិត្ត នៅតែដដែល អរគុណមិត្តល្អ»៕
