ថ្មីៗនេះ មហាជនអ្នកនិយមតាមដានជីវិតឯកជនរបស់ម្ចាស់ពានរង្វាន់កម្មវិធី Rapper Fighter រដូវកាលទី ១ លោក OG Golden ច្បាស់ជាបានជ្រាបមកហើយ ពីរឿងរ៉ាវបេះដូងរបស់លោក ដែលបានបើកចំហពីទំនាក់ទំនងស្នេហ៍រវាងនឹងតារាស្រីវ័យក្មេង កញ្ញា ជា វណ្ណពុទ្ធាលី ហៅ ជូលី។
ក្នុងនោះដែរ តារាចម្រៀងរ៉េបជំនាន់ថ្មី OG Golden និង តារាស្រីវ័យក្មេង ជូលី តែងតែបង្ហាញរូបភាព និង វីដេអូស្វីតៗ មិនលាក់លៀមក្នុងនាមជាគូស្នេហ៍នឹងគ្នា ធ្វើឱ្យអ្នកគាំទ្រលួចច្រណែននឹងគូនេះមិនតិចនោះឡើយ។
ក្រោយបើកចំហចំណងស្នេហ៍មិនប៉ុន្មាន ស្រាប់តែថ្មីៗនេះ អ្នកគាំទ្របានឃើញ លោក OG Golden និង កញ្ញា ជូលី បានថតឈុតរៀបការទាំងបុរាណ និង សម័យ ដូចជាឈុតថត Pre-Weeding។ យ៉ាងណាមិញ បើទោះជាមិនទាន់ច្បាស់ការថាជាការថតសម្អាងការ ឬយ៉ាងណា ប៉ុន្តែតាមរយៈវីដេអូខ្លីៗ ដែលលោក OG Golden បានបង្ហោះលើហ្វេសប៊ុកនោះ ឃើញខាងស្រីបានបង្ហាញចិញ្ចៀននៅម្រាមនាងដៃ ហាក់ដូចជាបញ្ជាក់ថា ជាចិញ្ចៀនបញ្ចាំចិត្ត ឬ ភ្ជាប់ពាក្យអ៊ីចឹង៕
