នៅថ្ងៃទី ០៧ ខែឧសភា ឆ្នាំ ២០២៥ ក្រសួងសុខាភិបាល បានជូនព័ត៌មានឱ្យបានដឹងថា នាពេលថ្មីៗនេះមានការផ្ទុះឡើងនៅប្រទេសជិតខាង និង បណ្តាប្រទេសមួយចំនួន នូវជំងឺអង់ត្រាក់ ឬ ហៅថាពិសធ្យូង នៅលើមនុស្ស និង នៅលើសត្វ ហៅថាជំងឺអង់ត្រាក់ ឬ ជំងឺឈាមខ្មៅ បង្កឡើងដោយបាក់តេរីដែលបង្កើតស្ព័រ (spore-forming bacillus anthracis) ខណៈនៅកម្ពុជាយើង បច្ចុប្បន្នមិនទាន់មានការរកឃើញជំងឺនេះនៅឡើយទេ។
ក្នុងនោះ ក្រសួងបានបញ្ជាក់ពីរបៀបចម្លង ដែលមនុស្សអាចឆ្លងមេរោគអង់ត្រាក់ តាមរយៈសកម្មភាព ៥ យ៉ាង ដែលមានដូចជា ៖
– ការប៉ះពាល់ដោយផ្ទាល់ជាមួយសត្វឈឺ (ស្បែកមុតដាច់ជាច្រកចូលនៃមេរោគ) ឬ ឆ្លងតាមការសម្លាប់សត្វ ដែលមានជំងឺអង់ត្រាក់ ឬ ផលិតផលដែលមានដើមកំណើតពីសត្វមានជំងឺអង់ត្រាក់ដូចជា សាច់ ឈាម រោម ឆ្អឹង
– ការដកដង្ហើមចូលនូវធូលី ដែលមានស្ទ័រមេរោគអង់ត្រាក់
– ការបរិភោគសាច់ដែលមានមេរោគអង់ត្រាក់
– ប្រើម្ជុលសឺរ៉ាំងរួមគ្នាជាមួយអ្នកមានជំងឺអង់ត្រាក់
– មេរោគអង់ត្រាក់មិនមានភស្តុតាងឆ្លងរាលដាលពីមនុស្សទៅមនុស្សនោះទេ ប៉ុន្តែដំបៅស្បែកលើអ្នកជំងឺ អង់ត្រាក់អាចឆ្លងខ្លាំង។
ក្រសួងបានពន្យល់ឱ្យដឹងថា ជំងឺអង់ត្រាក់ ឬ ពិសធ្យូង ជាជំងឺដ៏កម្រ ប៉ុន្តែធ្ងន់ធ្ងរ ដែលអាចកើតមានឡើងជាចម្បងលើសត្វពាហនៈ និង សត្វព្រៃ។ លក្ខណៈពិសេសនៃមេរោគអង់ត្រាក់ គឺអាចរស់នៅដោយស្រួលក្រោមរូបភាពជាគ្រាប់ស្ព័រ ក្នុងបរិយាកាសខាងក្រៅ។ ស្ព័ររបស់បាក់តេរីអង់ត្រាក់ ធន់នឹងធាតុអាកាសខាងក្រៅបាន អាចសំងំដល់រាប់ឆ្នាំ (៣០-៤០ ឆ្នាំ) នៅក្នុងដី សាកសពសត្វ និង លាមកសត្វ។ សត្វស៊ីស្មៅ មានគោ ក្របី ចៀម ពពែ សេះ អាចឆ្លងមេរោគនេះ ចូលក្នុងខ្លួន បន្ទាប់មកគ្រាប់ស្ព័រ ក្លាយជាមេរោគមានចលនា ហើយបញ្ចេញពិសរបស់វា ដែលមានគ្រោះថ្នាក់ដល់សុខភាព។ ជំងឺអង់ត្រាក់ នេះក៏មានឱសថសម្រាប់ព្យាបាល និង វ៉ាក់សាំងសម្រាប់ចាក់បង្ការផងដែរ៕
សម្រាប់រោគសញ្ញានៃជំងឺនេះ មានដូចក្នុងលិខិតខាងក្រោម ៖
