មហាជនប្រាកដជានៅចាំមិនភ្លេចនោះទេ នូវរឿង «តុលាការមុខដែក» របស់ចិនក្នុងឆ្នាំ ១៩៩៣ ជារឿងភាគដ៏ល្បីល្បាញទទួលបានការនិយមទស្សនាយ៉ាងច្រើនកុះករពីសំណាក់មហាជនប្រទេសជាច្រើនក្នុងតំបន់អាស៊ី។
ទាក់ទងនឹងរឿងនេះដែរ យើងមកមើលពីជីវិត និង មុខមាត់របស់តួអង្គដ៏សំខាន់នៅក្នុងរឿងនេះ គឺជាតួអង្គ លោកម្ចាស់ប៉ាវ ដែលសម្តែងដោយលោក Jin Chao-chun។ តាមព័ត៌មានបានឱ្យដឹងថា បច្ចុប្បន្នលោកមានវ័យ ៧២ ឆ្នាំទៅហើយ ហើយក្នុងនោះជីវិតរបស់លោកហាក់មានការលំបាកច្រើនណាស់តាំងពីក្មេងមក ពោលគឺទាំងការងារ និង សុខភាព។
លោក Jin Chao-chun ធ្លាប់ត្រូវគេបដិសេធច្រើនដងណាស់ក្នុងរង្វង់សិល្បៈ ដោយសារតែមុខមាត់មិនស្អាត រហូតដល់ធ្វើឱ្យលោកផ្អាកការងារទៅជាង ១០ ឆ្នាំឯណោះ។ លុះមកដល់ឆ្នាំ ១៩៩៣ លោកក៏មានសំណាងត្រូវគេរើសឱ្យសម្តែងជាតួអង្គ លោកម្ចាស់ប៉ាវ នៅក្នុងរឿង «តុលាការមុខដែក» នេះ ដែលធ្វើឱ្យមានអ្នកគាំទ្រលោកមិននឹកស្មាន។
យ៉ាងណាមិញ មកដល់ឆ្នាំ ២០១៧ នៅពេលដែលលោកមានវ័យ ៦៦ ឆ្នាំ លោកចាប់ផ្តើមមានការវិលមុខ និង ឈឺក្បាលយ៉ាងចម្លែក ព្រមទាំងមិនអាចចាំប៉ារ៉ូលរឿងបានដូចដើមឡើយ ហើយភរិយាក៏បាននាំលោកទៅមន្ទីរពេទ្យទើបដឹងថាលោកមានដុះដុំសាច់ក្នុងខួរក្បាលតម្រូវឱ្យមានការវះកាត់ជាបន្ទាន់។ កាលនោះលោកមិនគិតថាខ្លួនឯងនឹងរស់ឡើយ ហើយក៏បានផ្តាំផ្ញើភរិយាអស់ទៅហើយ តែជាសំណាងល្អការវះកាត់ក៏បានជោគជ័យ ហើយលោកក៏បានជាសះស្បើយតាំងពីពេលនោះមក៕
ប្រភព៖ Sanook
