និយាយពីប្រុសស្អាត ហេង ស័ក្តា ត្រូវបានគេស្គាល់ និង ចាប់អារម្មណ៍ខ្លាំងតាមរយៈស្នាដៃសម្ដែងជាតួឯកប្រុសក្នុងខ្សែភាពយន្តខ្មែរជាបន្តបន្ទាប់ ជាពិសេសគឺរឿង «ប្រពន្ធសម្អប់» របស់ស្ថានីយទូរទស្សន៍បាយ័ន ដែលលោកកំពុងទទួលបានការចាប់អារម្មណ៍សរសើរខ្លាំងជាមួយទេពកោសល្យសម្ដែងដ៏ប៉ិនប្រសប់របស់លោក។
លើសពីនេះ លោក ហេង ស័ក្ដា ក៏ឆក់បានការចាប់អារម្មណ៍សរសើរពីរូបសម្បត្តិដ៏ស្រស់សង្ហារបស់លោក ទាំងក្នុងសាច់រឿង និង ស្ទីលថតរូបផុសថ្មីៗលើបណ្ដាញសង្គម ដែលទាំងរូបរាង និង មុខមាត់មានមន្តស្នេហ៍ ទាក់ទាញបេះដូងអ្នកគាំទ្រមិនតិចឡើយ។
បច្ចុប្បន្ន ប្រុសស្អាត ហេង ស័ក្ដា អាចចាត់ទុកជាតារាសម្ដែងពន្លកថ្មីកំពុងមានសន្ទុះប្រជាប្រិយភាពខ្លាំងលើវិស័យសម្ដែង ដោយលោកតែងលេចមុខសម្ដែងខ្សែភាពយន្តភាគខ្មែរល្បីៗក្នុងទូរទស្សន៍ និង ជាតារាម៉ូឌែលក្ដោបការងារផ្សព្វផ្សាយផលិតផលក្នុងស្រុកជាច្រើនផងដែរ។
ដោយឡែក ងាកទៅចាប់អារម្មណ៍រឿងរ៉ាវឯកជនពាក់ព័ន្ធនឹងស្នេហាវិញ លោក ហេង ស័ក្តា កន្លងមក មានអ្នកគាំទ្រភាគច្រើនដែលទស្សនាគាំទ្រការសម្ដែងរបស់លោក គិតថារូបលោកមិនទាន់មានគូនៅឡើយ តែតាមពិតតារាប្រុសរូបនេះ មានម្ចាស់បេះដូងរួចហើយ និង បានបើកបង្ហាញចំណងស្នេហ៍ដ៏ផ្អែមល្ហែមជាមួយនារីស្រស់ស្អាតម្នាក់ជាសាធារណៈប៉ុន្មានឆ្នាំហើយដែរ៕
