កម្មវិធីប្រកួត Miss Universe ប្រចាំឆ្នាំ ២០២៥ នេះ គឺចាត់ទុកជាឆ្នាំដែលមានរឿងចម្រូងចម្រាស់មិនចេះចប់មិនចេះហើយ។ ក្នុងចំណោមរឿងដែលកើតឡើងអំឡុងពេលប្រកួតកម្មវិធី ករណី Miss Jamaica ដើរធ្លាក់ឆាករងរបួសធ្ងន់ធ្ងរ ក៏ទទួលបានការចាប់អារម្មណ៍ខ្លាំងណាស់ដែរ។
យ៉ាងណាមិញ ខណៈរឿងរ៉ាវនៅតែបន្តឡើងកម្ដៅមិនទាន់ស្ងប់ ស្រាប់តែថ្មីៗនេះ បវរកញ្ញាតំណាងប្រទេសហៃទី នាង Melissa Sapini ចេញបកផ្ដល់បទសម្ភាសជាមួយទស្សនាវដ្ដី People ជុំវិញករណី Miss Jamaica ដើរធ្លាក់ឆាក និង របៀបខាងស្ថាប័នចាត់ចែងដោះស្រាយលើបញ្ហានេះ។
នាង Melissa Sapini បាននិយាយថា ក្រោយ Miss Jamaica នាង Gabrielle Henry ដើរធ្លាក់ឆាក បេក្ខភាពទាំងអស់ត្រូវបានហៅទៅប្រជុំ ដោយនៅពេលនោះ ខាងអ្នករៀបចំ (organizer) បាននិយាយដដែលៗបន្ទោសបេក្ខភាពតំណាងប្រទេស Jamaica លើរឿងដែលនាងដើរធ្លាក់ឆាកនោះ។
Miss Haiti រូបនេះបានរៀបរាប់ថា៖ «ខ្ញុំមិនដឹងថាពួកគេចាត់ចែងបញ្ហានេះត្រឹមត្រូវឬអត់ទេ តែរឿងដំបូងដែលពួកគេបាននិយាយគឺ មកពីនាង (Miss Jamaica) មិនយកចិត្តទុកដាក់។ បន្ទាប់មក ពួកគេក៏បកស្រាយថា «ពិតហើយ សុវត្ថិភាពគឺជាកាតព្វកិច្ចចម្បងរបស់ពួកយើង» ហើយក្រោយមកក៏ទៅនិយាយអ៊ីចេះនិយាយអ៊ីចុះ។ អ៊ីចឹងតើពួកគេពិតជាយកចិត្តទុកដាក់លើបញ្ហានេះឬអត់? វាពិតជាគួរឱ្យខ្លាចណាស់»។
ដោយឡែក ខាងអ្នកតំណាងស្ថាប័ន MU ក៏បានចេញមកធ្វើសេចក្ដីប្រកាសឆ្លើយតបតាមការចេញផ្សាយរបស់ទស្សនាវដ្ដី People ថា៖ «គ្រោះថ្នាក់បានកើតឡើងនេះក៏ព្រោះតែនាងភ្លាត់ និង អាចមិនសម្លឹងមើលក្រោមពេលកំពុងដើរ។ យ៉ាងណាមិញ មិនមាននរណាម្នាក់ពីខាងស្ថាប័នបន្ទោសនាងឡើយ។ ឆាកគឺធំខ្លាំង កន្លែងដើរ catwalk គឺមានទំហំជាង ៥ ម៉ែត្រ ជាមួយបន្ទាត់ខ័ណ្ឌពណ៌សច្បាស់ៗ។ បេក្ខភាពដទៃផ្សេងទៀតក៏មិនមានជួបគ្រោះថ្នាក់ពេលដើរនោះដែរ ដូច្នេះមានន័យថាបរិយាកាសទីនោះគឺសុវត្ថិភាព ហើយការដើរដួលនោះគឺជាគ្រោះថ្នាក់ដាច់ដោយឡែក»៕
