មហាជនអ្នកប្រើប្រាស់បណ្ដាញសង្គម បាននាំគ្នាចែករំលែកវីដេអូបន្តគ្នាព្រោងព្រាត និង សម្ដែងក្ដីព្រួយបារម្ភ ចំពោះស្ត្រីដែលពពោះជិតគ្រប់ខែមួយរូប ដែលត្រូវបានបុរសម្នាក់ បើករថយន្តបុកពីក្រោយ នៅក្នុងភូមិសាស្ត្រខេត្តបាត់ដំបង ទាំងដែលកំពុងពពោះជិតគ្រប់ខែ បណ្ដាលឱ្យខ្សោយចង្វាក់បេះដូង និង ត្រូវបញ្ចូនទៅសង្គ្រោះបន្ទាន់នៅខេត្តសៀមរាប។
ទាក់ទិនទៅនឹងករណីនឹកស្មានមិនដល់នេះ តាមរយៈគណនីសាច់ញាតិដែលមានឈ្មោះ Heang Chayapitt បានបញ្ជាក់នៅយប់ថ្ងៃទី ៣០ ខែវិច្ឆិកា ឆ្នាំ ២០២៥ ឱ្យដឹងថា ៖ «បងប្អូនជួយស៊ែរខ្ញុំផង ប្អូនខ្ញុំឡានជិះមកបុកទាំងដែលគ្នាទម្ងន់ជិតគ្រប់ខែ ឥលូវប្អូនខ្ញុំត្រូវបញ្ចូនទៅសង្គ្រោះបន្ទាន់នៅសៀមរាបទៀត ព្រោះចង្វាក់បេះដូងខ្សោយ»។
ក្រោយជ្រាបករណីនេះ មហាជនអ្នកប្រើប្រាស់បណ្ដាញសង្គម បាននាំគ្នាសម្ដែងក្ដីហួសចិត្តទៅកាន់អ្នកបើកបររថយន្ត ដែលពុំមានការប្រុងប្រយ័ត្នគ្រប់ជ្រុងជ្រោយ ពិសេសសម្ដែងក្ដីបារម្ភ និង ឈឺចាប់ ចំពោះស្ត្រីមានផ្ទៃពោះ ដែលបានជួបគ្រោះថ្នាក់ក្នុងហេតុការណ៍នឹកស្មានមិនដល់ខាងលើ មានតែបួងសួង និង សង្ឃឹមថានឹងសុវត្ថិភាពទាំងម្ដាយនិងកូន៕
