កើតជាជនជាតិស្បែកខ្មៅ ស្ត្រីរូបនេះមិនចាញ់អ្នកស្បែកសឡើយ ពោលនាងបានក្លាយជាតារាម៉ូឌែលដ៏មានប្រជាប្រិយភាព និង មានទីផ្សារមិនធម្មតា។ Anok Yai នាងត្រូវបានគេស្គាល់ថា ជាម៉ូឌែលហ្វេហ្សិនស្បែកខ្មៅ មានសញ្ជាតិអាមេរិក កម្ពស់ដល់ទៅ ១,៧៨ ម៉ែត្រ និង អាយុ ២៨ ឆ្នាំ។
ប្រឡូកវិស័យម៉ូឌែលប្រមាណ ៨ ឆ្នាំ ក្រៅពីលេចធ្លោនៅក្នុងអាជីព នាងក៏ដើរតួលើកកម្ពស់ដល់ស្ត្រីស្បែកខ្មៅផងដែរ។ ជាក់ស្តែង ជាសមទ្ធិផលសម្រាប់អាជីព ថ្មីៗនេះ នាងបានឈ្នះជាម៉ូឌែលស្រីឆ្នើមប្រចាំឆ្នាំ ឬ Model of the Year នៅក្នុងកម្មវិធី 2025 British Fashion Awards ឬ ពានរង្វាន់ហ្វេហ្សិនអង់គ្លេសប្រចាំឆ្នាំ ២០២៥ ដែលធ្វើឡើងនៅក្នុងសាល Royal Albert Hall ស្ថិតនៅទីក្រុងឡុងដ៍ កាលពីរាត្រីថ្ងៃទី ១ ខែធ្នូ ឆ្នាំ ២០២៥។ ពិតណាស់! នេះជាមោទកភាពមួយសម្រាប់នាង ក៏ដូចជាជនជាតិស្បែកខ្មៅ ដែលត្រូវបានគេលើកតម្កើង។
តារាម៉ូឌែលស្បែកខ្មៅ Anok Yai នាងបានចាប់ផ្តើមល្បីល្បាញនៅក្នុងឆ្នាំ ២០១៧ នៅពេលដែលរូបថតរបស់នាងក្នុងពិធីជប់លៀងនៅ Howard University បានផ្ទុះខ្លាំងលើបណ្តាញសង្គម Twitter។ ក្នុងរយៈពេលតែប៉ុន្មានសប្តាហ៍ នាងត្រូវបានខាងភ្នាក់ងារម៉ូឌែលជាច្រើនទាក់ទង មុនពេលដែលនាងចុះកុងត្រាជាមួយភ្នាក់ងារ Next Model Management។
មកដល់ឆ្នាំ ២០១៨ នាងបានបង្កើតប្រវត្តិសាស្ត្រនៅម៉ាក Prada ក្លាយជាម៉ូឌែលស្ត្រីស្បែកខ្មៅទី ២ ដែលដើរបើកកម្មវិធីបង្ហាញម៉ូដ បន្ទាប់ពីតារាស្រីស្បែកខ្មៅទី ១ គឺ Naomi Campbell នៅឆ្នាំ ១៩៩៧។
ចាប់ពីពេលនោះមក នាងមានទីផ្សារខ្ពស់ទាំងក្នុងវិស័យហ្វេហ្សិន និង សម្រស់ ដូចជា ចុះកុងត្រាជាមួយផលិតផល Estée Lauder, ថតឡើងទំព័រមុខទស្សនាវដ្តី Vogue និង Elle រួមទាំង ដើរបង្ហាញម៉ូដឱ្យម៉ាកល្បីៗដូចជា៖ Saint Laurent, Mugler និង Versace ជាដើម៕
