កម្មវិធី Miss Universe លើកទី ៧៤ ដែលធ្វើឡើងនៅប្រទេសថៃ បានបញ្ចប់ទៅដោយរលូន កាលពីថ្ងៃទី ២១ ខែ វិច្ឆិកា ឆ្នាំ ២០២៥។ អំឡុងប្រកួត បវរកញ្ញាតំណាងឱ្យប្រទេសនីមួយៗ បានធ្វើឱ្យផ្ទុះការចាប់អារម្មណ៍ខ្លាំងតាមរយៈការស្លៀកពាក់ ក៏ដូចជាស្ទីលរៀបចំខ្លួនរបស់ពួកគេរៀងៗខ្លួន។
តាមការកត់សម្គាល់ផងនោះ ក្រៅពីបវរកញ្ញាកម្ពុជាពាក់ឈុត ដែលច្នៃឡើងដោយអ្នកច្នៃម៉ូដក្នុងស្រុក ក្នុងនោះក៏ឃើញមានបវរកញ្ញាមកពីប្រទេសចំនួន ២ ក៏បានជ្រើសរើសសម្លៀកបំពាក់ប្រ៊េនខ្មែរ ALmée បង្ហាញខ្លួននៅលើឆាកអន្តរជាតិផងដែរ។
ជាក់ស្តែង បវរកញ្ញាមកពីប្រទេសស៊ែប Miss Universe Serbia 2025 នាងបានជ្រើសរើសឈុតរបស់ម៉ាក ALmée សម្រាប់បង្ហាញនៅក្នុងវគ្គឈុតតំណាងជាតិ។ ពីម៉ាក ឈុតនេះមានឈ្មោះថា Time Voyage ជាខូឡិកហ្សិន Spirit Of The Forgotten ដែលរ៉ូបមានលក្ខណៈឌិនស្រោចទៅដោយត្បូងចម្រុះពណ៌។
ចំណែក បវរកញ្ញា វេណេស៊ុយអេឡា Miss Universe Venezuela 2025 នាងបានជ្រើសរើសរ៉ូបរបស់ម៉ាក ALmée សម្រាប់គ្រងនៅក្នុងកម្មវិធីជប់លៀង Coronation Party ក្រោយនាងជាប់តំណែងជា 2nd Runner-Up ឬ តំណែងរងទី ២ នៃកម្មវិធី Miss Universe 2025 និង ទទួលបានតំណែងពិសេសជា Miss Universe Americas ផងដែរ។
គួរឱ្យដឹងដែរថា ប្រ៊េន ALmée ត្រូវបានបង្កើតឡើងដោយកូនខ្មែរ ដែលមានស្ថាបនិកជាស្ត្រីវ័យក្មេងគឺ កញ្ញា Sokhong Taing។ ម៉ាកសម្លៀកបំពាក់នេះ ផ្តោតលើឈុតបែប Couture ឬ ឈុតប្រណីតខ្លាំងផ្តាច់មុខ ដែលបង្ហាញពីសិល្បៈ និង វប្បធម៌ ដ៏មានកិត្យានុភាព។ សម្លៀកបំពាក់ម៉ាកនេះ ត្រូវបានពាក់ដោយតារាអន្តរជាតិល្បីៗ ហើយកន្លងទៅថ្មីៗ ស្ថាបនិកក៏បាននាំយកខូឡិកហ្សិនទៅបង្ហាញក្នុងកម្មវិធីបង្ហាញម៉ូដអន្តរជាតិដ៏ធំគឺ New York Fashion Week 2025 នៅឯសហរដ្ឋអាមេរិកផងដែរ៕
