កាលពីថ្ងៃទី ២១ ខែវិច្ឆិកា ឆ្នាំ ២០២៥ កន្លងទៅ មានការភ្ញាក់ផ្អើលមួយបានកើតឡើងនៅព្រលានយន្តហោះប្រទេសអាល្លឺម៉ង់ ដោយអ្នកដំណើរជនជាតិរ៉ូម៉ានី ២ នាក់ មកយឺតខកជើងហោះហើរ Wizz Air ស្រាប់តែសម្រេចចិត្តរត់ដេញតាមយន្តហោះ ផ្អើលអស់បុគ្គលិក និង អ្នកដំណើរផ្សេងទៀតក្នុងព្រលាន។
ហេតុការណ៍ខាងលើនេះដែរ បានកើតឡើងមុនម៉ោង ៩ កន្លះយប់ (ពេលវេលាក្នុងតំបន់) ខណៈយន្តហោះ Wizz Air កំពុងត្រៀមខ្លួនហោះចេញពីក្រុង Cologne ប្រទេសអាល្លឺម៉ង់ ឆ្ពោះទៅកាន់ទីក្រុង Bucharest ប្រទេសរ៉ូម៉ានី។ ភ្លាមៗនោះ ស្រាប់តែមានបុរស ២ នាក់ ម្នាក់អាយុ ២៨ ឆ្នាំ និង ម្នាក់ទៀតអាយុ ៤៧ ឆ្នាំ បានបំបុកច្រកបង្អួចអាសន្ន គេចពីសន្តិសុខ ចូលទៅលើផ្លូវយន្តហោះ និង បញ្ចេញសកម្មភាពដែលមិនសមគួរ។
ជាក់ស្ដែង តាមរយៈវីដេអូដែលថតបាន និង បង្ហោះលើបណ្ដាញសង្គម បានបង្ហាញឱ្យឃើញបុរស ២ នាក់នោះ កំពុងរត់ទៅរកយន្តហោះ Wizz Air លើកដៃបក់ហៅពីឡុតឱ្យឈប់ និង ថែមព្យាយាមលួងលោមបុគ្គលិកព្រលានឱ្យពួកគេឡើងយន្តហោះទៀតផង។
យ៉ាងណាមិញ អ្វីៗមិនដូចពួកគេរំពឹងទុកឡើយ ដោយបុរស ២ នាក់នោះ ត្រូវបានប៉ូលិសចាប់ខ្លួនភ្លាមៗ និង ចោទពីបទបង្កគ្រោះថ្នាក់ដល់សុវត្ថិភាពអាកាសចរណ៍ ដែលជាបទឧក្រិដ្ឋធ្ងន់ធ្ងរសម្រាប់ប្រទេសនានា។ តាមព័ត៌មានបានឱ្យដឹងថា បុរស ២ នាក់ខាងលើអាចនឹងមិនដល់ថ្នាក់ជាប់ពន្ធនាគារនោះទេ ប៉ុន្តែអាចប្រឈមនឹងការពិន័យជាសាច់ប្រាក់ក្រាស់ក្រាល ដោយតាមកាសែត Világgazdaság ចំនួនទឹកប្រាក់ដែលពិន័យអាចរហូតដល់ ២៨ ៥០០ អឺរ៉ូ (ជាង ៣ ម៉ឺនដុល្លារ)៕
