កាលពីពេលថ្មីៗនេះ គេហទំព័រមួយឈ្មោះ Travel Off Path បានចេញផ្សាយអត្ថបទមួយនិយាយពីបណ្ដាប្រទេសចំនួន ៥ នៅលើពិភពលោក ដែលមានការឆបោកអ្នកទេសចរខ្លាំងក្លាជាងគេបំផុតលើពិភពលោក ដោយក្នុងចំណោមប្រទេសទាំង ៥ នោះក៏មានប្រទេសជិតខាងយើងមួយជាប់ផងដែរ ធ្វើឱ្យប្រទេសមួយនេះក្លាយជា Top កំពូលប្រចាំអាស៊ីអាគ្នេយ៍ដែលបោកប្រាស់អ្នកទេសចរក្នុងប្រទេសខ្លាំងក្លាជាងគេ។
ប្រទេស Top ទាំង ៥ ដែលជាប់ឈ្មោះជាប្រទេសឆបោកអ្នកទេសចរច្រើនជាងគេបំផុតលើពិភពលោករួមមាន លេខ ១ គឺប្រទេសអេហ្ស៊ីប លេខ ២ បារាំង លេខ ៣ ឥណ្ឌា លេខ ៤ តួកគី និង លេខ ៥ បានទៅលើប្រទេសថៃ។
តាមការរៀបរាប់ពី Travel Off Path បានពណ៌នាប្រទេសថៃថាជា «ដែនដីនៃស្នាមញញឹម» ប៉ុន្តែនៅភូកេត និង បាងកក ស្នាមញញឹមទាំងនោះគឺតែងលាក់បង្កប់កលល្បិចបោកប្រាស់។ ជនបោកប្រាស់ទាំងនោះគឺឆ្លៀតឱកាសផ្ដោតគោលដៅលើអ្នកទេសចរ ទាំងដែលអ្នកទេសចរទៅទីនោះដើម្បីតែសប្បាយ។
ការឆបោកទាំងនោះមានដូចជា ៖ ករណីមួយពេលអ្នកទេសចរជួលម៉ូតូទឹកជិះ ១ ម៉ោង ដល់ពេលយកមកសងវិញ ម្ចាស់ម៉ូតូក៏លេងល្បិចចង្អុលថាមានស្នាមឆ្កូតដែលមិនដឹងថាមានតាំងពីពេលណាមកទេ ហើយទាមទារឱ្យអ្នកទេសចររូបនោះសងសំណង ១ ពាន់ដុល្លារ។ ហួសហេតុជាងនេះទៀតនោះ ប៉ូលិសថៃក៏ចូលដៃជាមួយជនខិលខូចនោះទៀត ដោយគំរាមចាប់ខ្លួនបើសិនមិនសងសំណង។
ដោយឡែក ករណីមួយទៀត កើតឡើងចំពោះអ្នកទេសចរដែលចង់ទៅលេងវាំង ជួបអ្នករត់តុតុនៅក្បែរនោះ គេប្រាប់ថាវាំងបិទហើយ ដោយលើកហេតុផលថា ក្នុងវាំងគេរៀបចំពិធីសាសនា ឬ បោសលាងសម្អាតអ៊ីចឹងទៅ ដោយយកលេសសុំជូនទៅកន្លែងផ្សេងវិញ ដូចជាទៅហាងលក់ត្បូងជាដើម ដើម្បីពួកគេទទួលបានកុំមុយស្យុង៕
