ឈានដល់សប្តាហ៍ទី ១០ កាលពីយប់ថ្ងៃសៅរ៍កន្លងទៅនេះ កម្មវិធី «កម្លាំងគោជល់ – Red Bull Power» ពិតជាធ្វើឱ្យប្រិយមិត្តទស្សនាជក់ចិត្ត និង ផើតពោះមិនស្ទើរ ដោយសារក្នុងវគ្គនោះគឺជាវគ្គដ៏ពិសេស ដែលកម្មវិធីបានផ្តល់ឱកាសដល់បេក្ខជនធ្លាក់កាលពីសប្តាហ៍ទី ៩ ចំនួន ៦ នាក់ ប្រកួតជាមួយបេក្ខជន ៨ នាក់ទៀត ដែលធ្លាក់កាលពីវគ្គមុនៗ។ ចុងក្រោយ មានតែបេក្ខជនមានសមត្ថភាពខ្លាំងពិតប្រាកដតែ ២ នាក់ប៉ុណ្ណោះ មានសិទ្ធិប្រកួតបន្តក្នុងកម្មវិធី។
ពិតប្រាកដណាស់ ក្នុងវគ្គនោះនៅលើទីលានប្រកួត Red Bull Arena មានបេក្ខជនធ្លាក់កាលពីសប្តាហ៍ទី ៩ និង ធ្លាក់ពីវគ្គមុនៗ សរុបទាំងអស់ចំនួន ១៤ នាក់។ ពួកគេបានប្រកួតជាមួយវិញ្ញាសាពិបាកៗដល់ទៅ ៣ ដែលតម្រូវប្រើកម្លាំង បញ្ញា ស្មារតី និង យុទ្ធសាស្ត្រឱ្យអស់ពីលទ្ធភាព។
ជាក់ស្តែង នៅក្នុងវិញ្ញាទី ១ គឺ «របារដែកផ្តាច់និស្ស័យ» ពួកគេត្រូវប្រកួតជាឯកតោភាគី ដោយជម្រុះមកនៅត្រឹម ៨ នាក់។ បន្ទាប់មកត្រូវប្រកួតវិញ្ញាសាទី ២ គឺ «ល្បែងខួង» ដែលត្រូវចែកគ្នាជាពីរក្រុម ដោយក្នុងមួយក្រុមមានគ្នា ៤ នាក់។ ជាលទ្ធផល ក្រុម ៤ នាក់ ដែលមានបេក្ខជន សំណាង, សុខមី, រីហ្វីន, និង ដេវីត បានទទួលជ័យជម្នះ ប៉ុន្តែពួកគេត្រូវប្រឈមគ្នានៅវិញ្ញាសាទី ៣ គឺ «មហាកម្លាំង Red Bull» ដែលជាការទាញព្រ័ត្រមុខ ៤ ដើម្បីយកឈ្នះរៀងខ្លួន រើសយកអ្នកឈ្នះតែ ២ នាក់ប៉ុណ្ណោះ។
មុនប្រកួតវគ្គចុងក្រោយ បេក្ខជន រីហ្វីន និង ដេវីត ក៏ត្រូវបានបេក្ខជន ពន្លឺ ដែលកំពុងនៅទីសុវត្ថិភាព បានប្រើពាក្យសម្តីបំបាក់ទឹកចិត្ត ចង់ឱ្យចាញ់ត្រលប់ទៅផ្ទះផងដែរ តែផ្ទុយទៅវិញ ពាក្យនេះបានធ្វើឱ្យពួកគេកាន់តែមានកម្លាំងចិត្ត ដាក់ចិត្តត្រូវតែឈ្នះ ហើយឡើងទៅទម្លាក់អ្នកដែលនៅទីសុវត្ថិភាពវិញ។
លទ្ធផលបានដូចការតាំងចិត្តពិតមែន បេក្ខជន រីហ្វីន និង ដេវីត បានប្រឹងប្រែងរហូតយកឈ្នះ ក្លាយជាបេក្ខជនពីររូប ដែលមានសិទ្ធិប្រកួតនៅវគ្គបន្ត។ ជាពិសេស ពួកគេក៏ត្រូវជួបជាមួយបេក្ខជន ពន្លឺ ដែលបានបោះពាក្យសម្តីឌឺដងផងដែរ។ អីចឹង! សម្រាប់ប្រិយមិត្តវិញ គិតថា តើវគ្គបន្ទាប់ រីហ្វីន និង ដេវីត នឹងអាចទម្លាក់ ពន្លឺ បានដែរឬទេ?
កុំភ្លេចតាមដានកម្មវិធី «កម្លាំងគោជល់ – Red Bull Power» មានចាក់ផ្សាយរៀងរាល់ថ្ងៃសៅរ៍ វេលាម៉ោង ៦:៣០ នាទី ល្ងាចតទៅ នៅលើកញ្ចក់ទូរទស្សន៍ CTN តែមួយគត់ និង ផេកផ្លូវការ CTN TV ព្រមទាំងផេក RedBull Power – កម្លាំងគោជល់៕
