រយៈពេល ១២ ថ្ងៃហើយ ដែលបវរកញ្ញា ហ្វីយ៉ាតា កំពុងស្ថិតក្នុងដំណើរការប្រកួតលើឆាកអន្តរជាតិ Miss Universe 2025 នៅប្រទេសថៃ ដោយពីមួយថ្ងៃទៅមួយថ្ងៃ បវរកញ្ញារូបនេះ កាន់តែបង្ហាញពីសក្កានុពល និង ភាពជឿជាក់ រឹងមាំស្វាហាប់ក្នុងដំណើរការប្រកួត ទាំងទំនាក់ទំនង និង រៀបចំខ្លួនស្អាតឆ្វាចៗលេចធ្លោខ្លាំង បើទោះបីជាជួបបញ្ហាខ្លះៗប៉ះផ្លូវអារម្មណ៍អំឡុងពេលប្រកួតនេះក៏ដោយ។
ស្របពេលនេះដែរ មហាជនអ្នកគាំទ្រវិស័យបវរកញ្ញាកម្ពុជាលើបណ្ដាញសង្គម ក៏ដូចជាអ្នកក្នុងសិល្បៈជាច្រើន កំពុងបង្ហោះចែករំលែកនូវសកម្មភាពរបស់បវរកញ្ញា ហ្វីយ៉ាតា ភ្ជាប់ជាមួយពាក្យពេចន៍ស្ងើចសរសើរ និង ជូនពរលើកទឹកចិត្តចំពោះរូបនាងឱ្យកាន់តែមានកម្លាំងចិត្តឈរលើឆាកអន្តរជាតិដ៏អស្ចារ្យនេះ។
យ៉ាងណាមិញ ក្រៅពីមហាជនអ្នកគាំទ្រ បើងាកទៅមើលហ្វេសប៊ុករបស់អ្នកគ្រប់គ្រងស្ថាប័ន Miss Universe Cambodia វិញ គឺលោក Chhoy D. Archi ក៏តែងឈរនៅក្រោយបវរកញ្ញារបស់ខ្លួនដែរ គឺលោកតែងចែករំលែកពីបវរកញ្ញា ហ្វីយ៉ាតា ដោយបង្ហាញការលើកទឹកចិត្តគាំទ្ររាល់សកម្មភាពរបស់នាងពេញដោយក្ដីមោទកភាព ចំពោះភាពរឹងមាំមោះមុតរបស់ ហ្វីយ៉ាតា ក្នុងដំណើរការប្រកួតលើឆាកអន្តរជាតិនេះផងដែរ៕
