អបអរសាទរ ថ្ងៃទី ០២ ខែធ្នូ ឆ្នាំ ២០២៥ នេះ គឺជាខួបគម្រប់ ១០ ឆ្នាំ នៃការដាក់បញ្ចូលល្បែងទាញព្រ័ត្រ ក្នុងបញ្ជីបេតិកភណ្ឌវប្បធម៌អរូបី នៃមនុស្សជាតិរបស់អង្គការយូណេស្កូ (២ ធ្នូ ២០១៥ – ២ ធ្នូ ២០២៥)។
សូមរំឭកផងដែរថា នៅថ្ងៃទី ០២ ខែធ្នូ ឆ្នាំ ២០១៥ ពោលកាលពី ១០ ឆ្នាំមុន ប្រជាជនកម្ពុជា បាននាំគ្នាទះដៃអបអរសាទរប្រកបដោយទឹកចិត្តមោទក និង សប្បាយរីករាយចំពោះព្រឹត្តិការណ៍ជាប្រវត្តិសាស្ត្រ នៃការដាក់បញ្ចូលល្បែងទាញព្រ័ត្រ ក្នុងបញ្ជីបេតិកភណ្ឌវប្បធម៌អរូបី នៃមនុស្សជាតិរបស់អង្គការយូណេស្កូនៅក្នុងកិច្ចប្រជុំ របស់គណៈកម្មាធិការបេតិកភណ្ឌពិភពលោក នៅទីក្រុងវិនឌុក ប្រទេសណាមីប៊ី កាលពីថ្ងៃទី ០២ ខែធ្នូ ឆ្នាំ ២០១៥។
បើតាមសៀវភៅ «ល្បែងប្រជាប្រិយខ្មែរ» តាមការស្រាវជ្រាវរបស់ក្រុមជំនុំទំនៀមទម្លាប់ ព្រមទាំង សមាជិកឆ្លើយឆ្លងគ្រប់ខេត្ត រៀបរៀងដោយលោក ចាបពិន ផ្សាយចេញដោយពុទ្ធសាសនបណ្ឌិត បានបញ្ជាក់ថា «ល្បែងទាញព្រ័ត្រ» ជាល្បែងលេងកម្សាន្តសប្បាយរបស់យុវជនខ្មែរទាំងបុរស ទាំងស្ត្រី កំលោះ ក្រមុំ។ ល្បែងនេះ គេលេងដោយប្រើកម្លាំងកាយជាមូលហេតុ ហើយគេលេងតែនៅរដូវចូលឆ្នាំខ្មែរ គឺខែ ចែត្រ-ពិសាខប៉ុណ្ណោះ។ ល្បែងនេះ គេច្រើននិយមលេងក្នុងវត្តអារាម ក្នុងពិធីបុណ្យចូលឆ្នាំខ្មែរ ព្រោះវត្តមានទីវាល ធំទូលាយ ងាយដល់ការលេងល្បែងនេះ តែអាចលេងនៅតាមភូមិក៏បាន ប្រសិនបើភូមិនោះ មានមនុស្ស នៅផ្តុំគ្នាច្រើន ហើយមានទីវាល ល្មមលេងកើត។ ល្បែងនេះ គេច្រើនលេងនៅពេលថ្ងៃ តែបើប្រសិនជា មានចង្កៀងយ៉ាង ភ្លឺ ឬ ពន្លឺព្រះចន្ទ ភ្លឺថ្លា ល្អ គេអាចលេងនៅពេលយប់ក៏បាន។ ចំពោះគ្រឿងប្រដាប់សម្រាប់លេង គេយកខ្សែព្រ័ត្រធ្វើពីស្បែកគោ ស្បែកក្របីធ្វើជាព្រ័ត្រ ឬគេយកពួរធ្វើពីជក់ដួងជាព្រ័ត្រ សម្រាប់ទាញប្រវែងយ៉ាងខ្លីពី ២០ ហត្ថឡើងទៅ ទំហំប៉ុនកដៃក្មេង ហើយនឹងយកសម្ភោរ ឬ គងម៉ង ឬ ក៏រគាំង១ សម្រាប់ទះ ឬ សម្រាប់វាយនៅពេលដែលទាញដំបូង៕
