បើលើកឡើងពីម្ចាស់ជ័យលាភីលេខ ២ Freshie Girl ឆ្នាំ ២០០៨ អ្នកនាង ប៊ីរីយ៉ា នាពេលនេះច្បាស់ណាស់អ្នកគាំទ្រនឹងមានការនឹករឭករូបនាងយ៉ាងខ្លាំង ខណៈបច្ចុប្បន្នអតីតារាស្រីរូបនេះបានរសាត់ឆ្ងាយពីសិល្បៈសឹងទាំងស្រុងទៅហើយ។
គេចាំបានថា ក្រោយចប់ការប្រកួតសម្រស់ និង ទទួលបានចំណាត់ថ្នាក់លេខ ២ Freshie Girl ឆ្នាំ ២០០៨ ភ្លាមៗ អ្នកនាង ប៊ីរីយ៉ា បានបោះជំហានយ៉ាងជោគជ័យលើវិថីសិល្បៈ ក្នុងនាមជាពិធីការិនី តារាសម្តែង និង ជាតារាបង្ហាញម៉ូដ។ លុះមកដល់ឆ្នាំ ២០១៤ អ្នកនាង ប៊ីរីយ៉ា បានបញ្ចប់ភាពនៅលីវសម្រេចចិត្តរៀបការសាងគ្រួសារ និង ចាប់ផ្តើមរយាលពីសិល្បៈបន្តិចម្តងៗ។
ដោយឡែក មកដល់បច្ចុប្បន្ន អ្នកនាង ប៊ីរីយ៉ា ក៏មិនសូវបានបង្ហាញវត្តមានក្នុងកម្មវិធីរបស់អ្នកសិល្បៈច្រើននោះដែរ ដោយសារសព្វថ្ងៃអតីតតារាស្រីរូបនេះ កំពុងសំងំធ្វើជាថៅកែហាងមានមុខរបរច្រើនក្នុងដៃ រួមមាន ហាងកាហ្វេ ហាងលក់សម្លៀកបំពាក់ និង ចំណីអាហារ ជាដើម។ ក្នុងនោះ ភាគច្រើនអ្នកនាង ប៊ីរីយ៉ា គឺធ្វើការលក់ទំនិញតាមអនឡាញ ក្រោមយីហោឈ្មោះ «Bina Live»៕
