ថ្ងៃកំណើតរបស់មនុស្សម្នាក់ៗ មានចំណុចពិសេសរៀងៗខ្លួន ដែលអាចឱ្យយើងទាយដឹងពីលក្ខណៈសម្បត្តិរបស់បុគ្គលបាន ទោះមិនបានច្រើនក៏បានតិចដែរ គឺពិតជាគួរឱ្យកត់សម្គាល់។
យ៉ាងណាមិញ បើនិយាយទៅដល់មនុស្សកើតថ្ងៃអង្គារវិញ ភាគច្រើនត្រូវបានគេស្គាល់ថាជាមនុស្សឆេវឆាវបន្តិច គឺមាត់រហ័សមាត់ឆៅ និង រឹងក្បាល ជាដើម ប៉ុន្តែតាមពិតមនុស្សកើតថ្ងៃនេះគឺមិនដូចជាគេឃើញទាំងអស់នោះទេ។
ដ្បិតតែសម្បកក្រៅ មើលទៅជាមនុស្សមានឆេវឆាវ និង ឯករាជ្យបន្តិចពិតមែន ប៉ុន្តែនៅខាងក្នុង តាមពិតមនុស្សកើតថ្ងៃអង្គារជាមនុស្សទន់ជ្រាយម្នាក់ ដែលត្រូវការអ្នកយល់ចិត្តប៉ុណ្ណោះ។ ព្រោះតែកម្លាំងអារម្មណ៍ដ៏ខ្លាំងក្លា ទើបធ្វើឱ្យមនុស្សកើតថ្ងៃអង្គារ តែងតែមានសម្តីរហ័សជាងការគិត ប៉ុន្តែពួកគេមិនបានតាំងចិត្តធ្វើបាបនរណាតាមរយៈសម្តីឡើយ។
មនុស្សកើតថ្ងៃអង្គារ មិនចូលចិត្តឱ្យគេមើលមកថាខ្លួនទន់ជ្រាយ ទើបខំលាក់វាទុកមិនឱ្យនរណាឃើញ និង បញ្ចេញមកតែភាពរឹងមាំប៉ុណ្ណោះ ហេតុនេះហើយទើបធ្វើឱ្យមានការហត់នឿយផ្លូវចិត្តជាខ្លាំង។ និយាយរួមទៅ មនុស្សកើតថ្ងៃអង្គារ ត្រូវការមនុស្សម្នាក់ដែលបើកចិត្តព្រមមើលឱ្យធ្លុះពីសម្បកក្រៅ មនុស្សដែលចាំនៅជិត និង ទទួលយកភាពទន់ជ្រាយរបស់ពួកគេបានដោយមិនវាយតម្លៃ៕
