ប្រទេសម៉ាល់ឌីវ បានដាក់ចេញវិធានការហាមប្រាមការជក់បារី សម្រាប់ពលរដ្ឋ និង អ្នកទេសចរទាំងអស់ដែលកើតក្រោយថ្ងៃទី ០១ ខែមករា ឆ្នាំ ២០០៧។ វិធានការថ្មីនេះដែរ នឹងចាប់អនុវត្តឡើងចាប់ពីថ្ងៃទី ០១ ខែវិច្ឆិកា ឆ្នាំ ២០២៥ តទៅ ដែលជាគំនិតផ្ដួចផ្ដើមឡើងដោយលោកប្រធានាធិបតី Mohamed Muizzu កាលពីដើមឆ្នាំនេះ ក្នុងបំណងការពារសុខភាពសាធារណៈ និង ផ្សព្វផ្សាយយុវវ័យជំនាន់ឆ្នាំ ២០០៧ ឱ្យនិយាយថាទេចំពោះថ្នាំជក់។
ក្រោមច្បាប់ថ្មីនេះ អ្នកដែលកើតក្នុងថ្ងៃ ឬក្រោយថ្ងៃទី ០១ ខែមករា ឆ្នាំ ២០០៧ នឹងត្រូវហាមប្រាមមិនឱ្យទិញ លក់ និង ប្រើប្រាស់រាល់ផលិតផលថ្នាំជក់លើប្រទេសម៉ាល់ឌីវឡើយ។ ចំពោះអ្នកដែលលក់បារីនៅលើកោះ នឹងត្រូវបញ្ជាក់អាយុអ្នកទិញជាមុនសិន មុននឹងលក់ឱ្យគេ។
បន្ថែមពីនេះ ខាងក្រសួងសុខាភិបាលប្រចាំប្រទេសម៉ាល់ឌីវ បានបន្ថែមទៀតថា ពួកគេក៏រក្សាការហាមឃាត់ទៅលើការនាំចូល លក់ ចែកចាយ កាន់កាប់ និង ប្រើប្រាស់ប្រភេទបារីអេឡិចត្រូនិច លើមនុស្សគ្រប់វ័យក្នុងប្រទេសផងដែរ។ គួរបញ្ជាក់ថា ការលក់បារីទៅឱ្យក្មេងមិនទាន់គ្រប់អាយុ ប្រឈមនឹងការពិន័យជាប្រាក់ចំនួន ៥ ម៉ឺន rufiyaa (៣២០០ ដុល្លារ) ខណៈការរកឃើញប្រើប្រាស់បារីអេឡិចត្រូនិច ប្រឈមនឹងការពិន័យចំនួន ៣២០ ដុល្លារ៕
