អ្នកមានសង្សារស្រីអាយុច្រើនជាង សុទ្ធតែសំណាង មិនមែនមកពីទ្រព្យសម្បត្តិលុយកាស តែគឺជារឿងប៉ុន្មានយ៉ាងនេះ 

នៅក្នុងទំនាក់ទំនងស្នេហា បើបុរសសង្សារមានអាយុច្រើនជាងមិនជាថ្វី តែបើមនុស្សស្រីមានអាយុច្រើនជាង គេនឹងមានអារម្មណ៍ហាក់ដូចមិនទំនង ដោយគេគិតថា បុរសអាចជាទីបង្គង ឬរឹងមាំអាចពឹងពាក់បាន។ យ៉ាងណាមិញ តាមការសិក្សាជាច្រើន ការមានសង្សារស្រីអាយុច្រើនជាង មិនត្រឹមតែលើសពីភាពរឹងមាំប៉ុណ្ណោះទេ តែក៏មានប្រយោជន៍ជាមួយបទពិសោធជីវិតច្រើនផងដែរ។ ខាងក្រោមនេះ ជាអត្ថប្រយោជន៍ ៥ យ៉ាង នៃការមានសង្សារស្រីអាយុច្រើនជាង។

១. ពូកែសន្ទនា

ស្ត្រីអាយុច្រើន ច្រើនតែវ័យឆ្លាត ដោយសារពួកគេមានបទពិសោធច្រើន  ដែលអាចបង្កើតការសន្ទនាជាមួយគំនិតល្អៗ យោបល់គួរឱ្យចាប់អារម្មណ៍ និង មានការយល់ដឹងទូលំទូលាយ។

២. មិនងាយរត់ចោលដៃគូ

ស្ត្រីអាយុច្រើនមានគំនិតដូចបុរស នាងយល់ពីខ្លួនឯងច្បាស់ និង ដឹងពីអ្វីដែលនាងចង់បាននៅក្នុងទំនាក់ទំនង។ នាងមានការប្តេជ្ញាខ្ពស់ ហើយតែងតែលើកឡើងនូវចំណុចល្អៗ ដើម្បីរក្សាទំនាក់ទំនង។ ជាពិសេស នៅពេលជួបស្ថានភាពលំបាក នាងតែងតែចូលរួមដោះស្រាយ មិនងាយរត់ចោលបុរសដៃគូឡើយ។

៣. ស្រលាញ់មួយណា ច្បាស់មួយហ្នឹង!

ស្ត្រីវ័យក្មេង ភាគច្រើននាងរីករាយតែពេលកំពុងទាក់ទងស្នេហាគ្នាប៉ុណ្ណោះ ដល់ពេលឆ្អែតឆ្អន់ នាងក៏ដោះដៃ ទៅរកអ្នកផ្សេងអារម្មណ៍ប្លែកថ្មី។ ផ្ទុយមកវិញ ស្ត្រីអាយុច្រើនជាង នាងយល់ពីផលវិបាកក្នុងការស្វែងរកមនុស្សច្បាស់លាស់ ហេតុដូចនេះ នៅពេលនាងរកឃើញបុរសណាម្នាក់ដែលត្រូវចិត្ត នាងនឹងព្យាយាមធ្វើឱ្យទំនាក់ទំនងរលូន ដោយមិនបោះបង់ងាយៗ ព្រោះតែហេតុផលល្ងង់ខ្លៅ។ ជាធម្មតា នាងគិតគូរវែងឆ្ងាយ និង គិតតែរឿងមានប្រយោជន៍ដល់ទំនាក់ទំនង។​

៤. ទន់ភ្លន់ តែមិនទន់ជ្រាយ

ស្ត្រីអាយុច្រើន តែងមានភាពរឹងមាំ នាងមានភាពក្លាហាន មានមហិច្ឆតា និង ចាប់ផ្តើមមានគោលដៅច្បាស់លាស់។ នាងអាចបង្កើតការសម្រេចចិត្តអ្វីមួយដោយខ្លួនឯង និង អាចធ្វើរឿងជាច្រើនដោយខ្លួនឯង ដោយមិនចាំបាច់ឱ្យដៃគូមកឈឺក្បាលជាមួយនាង។ ពេលខ្លះនាងក៏ជាអ្នកត្រួសត្រាយផ្លូវ នាំមកនូវដំបូន្មានល្អៗដល់ដៃគូផងដែរ។

៥. អាចរៀនច្រើនពីនាង!

ដោយសារនាងបានឆ្លងកាត់មេរៀនជីវិតមុន នាងនឹងចែករំលែកបទពិសោធ មិនថាការគិត ចំណេះដឹង ការប្រកួតប្រជែង រួមជាមួយភាពវ័យឆ្លាត ដែលអាចអភិវឌ្ឍន៍រីកចម្រើនទាំងនាង និង ដៃគូ៕​

ប្រភព៖ ED