នៅថ្ងៃទី ១ ខែវិច្ឆិកា ឆ្នាំ ២០២៥ នេះ មហាជនអ្នកគាំទ្រលើបណ្ដាញសង្គមបានចែករំលែក និង បង្ហាញក្ដីអាណិតបារម្ភពី MC លីស្សា ក្រោយទទួលដំណឹងថា នាងកំពុងធ្លាក់ខ្លួនឈឺធ្ងន់សន្លប់មិនដឹងខ្លួន និង ខ្វះលទ្ធភាពព្យាបាលជំងឺ។
តាមរយៈការបង្ហោះលើគណនីហ្វេសប៊ុក RieRie Ma បានជូនដំណឹងពីស្ថានភាពរបស់ MC លីស្សា ឱ្យដឹងថាពេលនេះ នាងកំពុងសម្រាកព្យាបាលនៅមន្ទីរពេទ្យខេត្តព្រះសីហនុ ដែលមានអការៈសន្លប់បាត់ស្មារតីមួយយប់ និង បានដឹងខ្លួនវិញ ប៉ុន្តែគ្មានកម្លាំងកំហែង រវើរវាយនិយាយមិនដឹងអ្វី ដោយគ្រូពេទ្យប្រាប់ថាមានសង្ឃឹមតិចណាស់។ ក្នុងនោះដែរ RieRie Ma ក៏បានរៀបរាប់ឱ្យដឹងថាពេលនេះ MC លីស្សា កំពុងមានជីវភាពលំបាកខ្លាំង ដែលមិនមានលទ្ធភាពព្យាបាលជំងឺរបស់ខ្លួនទេ។
ការបង្ហោះនោះ RieRie Ma បានរៀបរាប់ថា ៖ «ជម្រាបសួរបងប្អូនទាំងអស់គ្នា។ បងស្រី MC Lisha មានជំងឺជាទម្ងន់ បានសន្លប់បាត់ស្មារតីអស់រយៈពេលមួយយប់ហើយកាលពីម្សិលមិញនៅមន្ទីរពេទ្យ ព្រះសីហនុ មណ្ឌលនៃក្តីសង្ឃឹម។ ថ្ងៃនេះបានដឹងខ្លួនមួយភ្លែត តែគ្មានកម្លាំងកំហែង ខ្ញាំដៃខ្ញាំជើង រវើរវាយនិយាយមិនដឹងទិសតំបន់ទេ គួរឱ្យសង្វែគណាស់។ គ្រូពេទ្យប្រាប់ថាមានសង្ឃឹមតិចណាស់។ បង Lisha មានជីវភាពលំបាកខ្លាំងណាស់ រស់មួយថ្ងៃពឹងមួយថ្ងៃ សំខាន់ឱ្យតែបានរស់នៅមានដង្ហើមដក។ ឈឺម្តងៗគាត់តស៊ូខ្លាំងណាស់ ពេលខ្លះ សុខចិត្តដេកញាក់ម្នាក់ឯងមិនហ៊ានទៅពេទ្យ ព្រោះគ្មានលទ្ធភាព!! តែលើកនេះគាត់ទ្រាំទ្រលែងបានហើយ.. ខ្ញុំសូមសំណូមពរដល់បងប្អូនអ៊ំពូមីង សប្បុរសជនទាំងអស់ ដែលមានមេត្តាធម៌ និង សេចក្តីអាណិតអាសូរដល់បង Lisha មេត្តាជួយសម្រាលបន្ទុកដល់បងស្រី និង ក្រុមគ្រួសារឱ្យបងស្រីមានឱកាសមើលឃើញពិភពលោកនេះបន្តផង គាត់ពិតជាចង់រស់ខ្លាំងណាស់!! បងប្អូនអាចចូលរួមជួយបង Lisha បានតាមរយៈ ABA របស់ខ្ញុំសិន ហើយពេលបាន QR ម្តាយរបស់គាត់ខ្ញុំនឹងផ្តល់ជូនបងប្អូន។ យើងខ្ញុំសូមអរគុណបងប្អូនអ៊ំពូមីងទាំងអស់គ្នាទុកជាមុន»៕
