កាលពីថ្ងៃទី ០៩ ខែធ្នូ ឆ្នាំ ២០២៤ កន្លងទៅ សារព័ត៌មាន NBC News បានចេញផ្សាយថា តារារ៉េប Jay-Z ដែលត្រូវជាស្វាមីរបស់កំពូលតារាចម្រៀង Beyoncé កំពុងរងការចោទប្រកាន់លើករណីរំលោភបំពានលើក្មេងស្រីអាយុត្រឹម ១៣ ឆ្នាំ ជាមួយនឹងតារារ៉េប Diddy កាលពីឆ្នាំ ២០០០។ ពាក្យបណ្ដឹងដើមត្រូវបានដាក់នៅតុលាការ Southern District Court of New York សហរដ្ឋអាមេរិក កាលពីខែតុលា ឆ្នាំ ២០២៤ កន្លងទៅដោយពេលនោះមានតែ Diddy ម្នាក់ប៉ុណ្ណោះជាចុងចោទ។ យ៉ាងណាមិញ ពាក្យបណ្ដឹងថ្មីបានធ្វើឡើងកាលពីថ្ងៃទី ០៨ ខែធ្នូ ឆ្នាំ ២០២៤ កន្លងទៅនេះ (ពេលវេលាក្នុងតំបន់) ដោយបន្ថែមឈ្មោះចុងចោទម្នាក់ទៀតគឺជាតារារ៉េប Jay-Z នេះឯង។
ដើមបណ្ដឹងដែលមិនបញ្ចេញឈ្មោះដោយត្រូវបានគេហៅក្រៅថា Jane Doe បាននិយាយថា ករណីបំពាននោះបានកើតឡើងក្រោយរូបនាងត្រូវបានគេនាំទៅកម្មវិធីជប់លៀងមួយក្រោយបញ្ចប់កម្មវិធីពានរង្វាន់ MTV Video Music Awards។ តាមការបញ្ជាក់របស់នាងបានឱ្យដឹងថា នាងត្រូវបានអ្នកបើកឡានឱ្យ Diddy ចូលមកហៅនាងទៅចូលរួមពិធីជប់លៀងនោះ ដោយក្រោយមក នាងក៏ត្រូវបានគេដឹកចូលទៅក្នុងផ្ទះពណ៌សមួយដែលមានច្រកចូលរាងជាអក្សរ U។ មុនចូលទៅក្នុង នាងក៏ត្រូវស៊ីញ៉េលើក្រដាសព្រមព្រៀងមួយរបស់ពិធីជប់លៀងដែលមានការចូលរួមពីសំណាក់តារាល្បីៗជាច្រើន រួមទាំងមានការប្រើប្រាស់កញ្ឆា និង កូកាអ៊ីនទៀត។
តាមការរៀបរាប់របស់ Jane Doe ដែលជាជនរងគ្រោះបានឱ្យដឹងថា៖ «មិត្តខ្ញុំម្នាក់បានបើកឡានជូនខ្ញុំទៅកម្មវិធីពានរង្វាន់ដែលធ្វើឡើងនៅ Radio City Music Hall។ ខ្ញុំអត់មានសំបុត្រទេ ដូច្នេះហើយខ្ញុំបានព្យាយាមសួរគេជុំវិញហ្នឹងដើម្បីបានចូលទៅក្នុងកម្មវិធីពានរង្វាន់នោះ ឬក៏ពិធីជប់លៀងក្រោយនោះក៏បាន។ ពេលនោះហើយក៏មានអ្នកបើកឡានម្នាក់ដែលអះអាងថាគាត់ធ្វើការឱ្យ Diddy បានមកហៅខ្ញុំឱ្យទៅចូលរួមកម្មវិធីជប់លៀងដែលរៀបចំឡើងដោយតារារ៉េបរូបនោះផ្ទាល់។ ខ្ញុំមិនដឹងសោះឡើយថា ខ្ញុំតាមពិតជាសត្វដែលគេកំពុងប្រមាញ់សោះ»។
Jane Doe បានទម្លាយឱ្យដឹងទៀតថា នាងត្រូវបានគេបំបុកឱ្យផឹកគ្រឿងស្រវឹងរហូតធ្វើឱ្យនាងមានអារម្មណ៍វិលមុខ ហើយក៏ត្រូវគេនាំយកទៅបន្ទប់ដាច់ដោយឡែកមួយ។ ក្រោយមក នាងក៏ឃើញ Diddy មកជាមួយតារា ២ នាក់ផ្សេងទៀតដោយម្នាក់ជា Jay-Z និង ម្នាក់ទៀតជាតារាស្រី បានចូលក្នុងបន្ទប់នោះជាមួយខ្សែភ្នែកដ៏អាក្រក់ និង បង្ខំនាងឱ្យធ្វើសកម្មភាពផ្លូវភេទ។ Diddy និង Jay-Z ត្រូវចោទថាជាអ្នកប្រព្រឹត្តបំពានលើជនរងគ្រោះ ខណៈតារាស្រីដែលមិនបញ្ចេញឈ្មោះនោះ នៅឈរមើលគេធ្វើសកម្មភាព។
ក្រោយពាក្យបណ្ដឹងចោទប្រកាន់បានផ្ទុះផ្អើលឡើង មិនយូរប៉ុន្មាន តារារ៉េប Jay-Z ក៏បានចេញមុខមកបដិសេធលើការចោទប្រកាន់នោះតាមរយៈគណនីបណ្ដាញសង្គម X របស់ក្រុមហ៊ុនរបស់លោក Roc Nation។ លោកបានរិះគន់លើលោក Tony Buzbee ដែលជាមេធាវីរបស់ជនរងគ្រោះថា ពាក្យបណ្ដឹងនោះគឺធ្វើឡើងក្នុងបំណងចង់ជំរិតលោក។
លោកបានរៀបរាប់ថា៖ «ខ្ញុំនឹងមិនឱ្យលុយអ្នកសូម្បីមួយសេនឡើយព្រោះតែការចោទប្រកាន់របស់អ្នកទាំងប៉ុន្មានគឺជារឿងមិនពិតទាំងអស់។ ក្នុងនាមជាបុគ្គលសាធារណៈម្នាក់ ខ្ញុំត្រូវតែចេញមុខមកនិយាយពីបញ្ហានេះ ចេញមកលាតត្រដាងបកអាក្រាតទង្វើភូតកុហករបស់អ្នក។ ការចោទប្រកាន់របស់អ្នកដែលដាក់កម្រិតមកលើខ្ញុំនេះគឺវាសាហាវណាស់ ដែលខ្ញុំអង្វរឱ្យអ្នកទៅដាក់ពាក្យបណ្ដឹងព្រហ្មទណ្ឌទៅ កុំដាក់ពាក្យបណ្ដឹងរដ្ឋប្បវេណីដូចដែលអ្នកកំពុងដាក់នេះអី។ អ្នកដែលប្រព្រឹត្តទង្វើបែបនេះលើអនីតិជនគួរតែត្រូវជាប់គុកមិនអ៊ីចឹងអី? ជនរងគ្រោះគួរតែទទួលបានយុត្តិធម៌ប្រសិនបើការពិតដូចអ្វីដែលបានចោទប្រកាន់នោះមែន»។
គួរឱ្យដឹងដែរថា ចំពោះការប្រតិកម្មតបរបស់តារារ៉េប Jay-Z នេះ ខាងមេធាវីលោក Tony Buzbee នៅមិនទាន់ចេញមុខឆ្លើយតបនៅឡើយទេ៕
ប្រភព៖ Kenh14
