សារព័ត៌មាន Hk01 បានរាយការណ៍ពីរឿងរ៉ាវមួយនៅក្នុងប្រទេសចិន ដែលបុរសម្នាក់បានយកខោអាវទៅព្យួរចំក្បាលរូប៊ីណេទឹកពន្លត់អគ្គិភ័យ ខណៈកំពុងស្នាក់នៅក្នុងបន្ទប់សណ្ឋាគារមួយ មានអីទឹកចេញដោយស្វ័យប្រវត្តិ លិចសណ្ឋាគារគេអស់ ២ ជាន់។
តាមព័ត៌មានបានឱ្យដឹងថា ក្រោយពីភ្ញៀវរូបនេះបានយកខោអាវទៅព្យួរចំក្បាលរូប៊ីណេទឹកពន្លត់អគ្គិភ័យ (Fire Springer) នៅក្នុងបន្ទប់ ទឹកក៏បានបាញ់ចេញមកយ៉ាងលឿនដោយស្វ័យប្រវត្តិ ទោះបីជាខាងបុគ្គលិកនាំគ្នាប្រញាប់ទៅបិទម៉ាស៊ីនទៅហើយក៏ដោយ ក៏ទឹកបានហូរមកអស់ប្រមាណជាង ១ ម៉ឺនលីត្រ និងធ្វើឱ្យលិចទទឹកអស់សណ្ឋាគារចំនួន ២ ជាន់ឯណោះ។
យ៉ាងណាមិញ ខាងសណ្ឋាគារបានទាមទារសំណងពីភ្ញៀវខាងលើនេះ ក្នុងការសម្អាត និងជួសជុលប្រមាណជាង ២ ម៉ឺនដុល្លារ តែខាងភ្ញៀវបានបដិសេធដោយឱ្យហេតុផលថា ចំនួនលុយច្រើនខ្លាំងពេក។ ចុងក្រោយ ខាងសណ្ឋាគារក៏បានប្តឹងទៅតុលាការ ឱ្យជួយដោះស្រាយបញ្ហានេះឱ្យវិញ៕
