ថ្មីៗនេះ តុលាការនៅក្នុងប្រទេសអាល្លឺម៉ង់ បានសម្រេចកាត់ក្តីឱ្យបុរសជាគិលានុបដ្ឋាកយិកាម្នាក់ ឱ្យជាប់គុកអស់មួយជីវិត ក្រោយពីបានសម្លាប់អ្នកជំងឺអស់ ១០ នាក់ ដោយសារតែខ្ជិលធ្វើការ។
តាមព័ត៌មានបានឱ្យដឹងថា ហេតុការណ៍បានកើតឡើងនៅក្នុងអំឡុងចាប់ពីខែធ្នូ ឆ្នាំ២០២៣ រហូតដល់ខែឧសភា ឆ្នាំ២០២៤ នៅមន្ទីរពេទ្យមួយក្នុងទីក្រុង Würzelen ភាគខាងលិចប្រទេសអាល្លឺម៉ង់ ដែលបុរសខាងលើនេះ ជាគិលានុបដ្ឋាកយិកាប្រចាំការក្នុងមន្ទីរពេទ្យនេះផ្ទាល់។ បុរសនេះ បានចាក់ថ្នាំបំបាត់ morphine និង midazolam ក្នុងបរិមាណច្រើនហួសកម្រិតឱ្យទៅអ្នកជំងឺវ័យចំណាស់ជាច្រើន ដោយក្នុងបំណងធ្វើឱ្យពួកគេងងុយគេង ឬសន្លប់ស្មារតីតែម្តង។
យ៉ាងណាមិញ បុរសនេះបានប្រព្រឹត្តសកម្មភាពបែបនេះ ព្រោះតែមិនចង់មើលថែអ្នកជំងឺច្រើននៅពេលដែលខ្លួនចូលវេនយប់។ ក្នុងនោះ បុរសនេះបានសម្លាប់អ្នកជំងឺអស់ចំនួន ១០ នាក់ និងបានព្យាយាមសម្លាប់ចំនួន ២៧ នាក់ទៀត តែមិនបានសម្រេច។ ចុងក្រោយ បុរសនេះត្រូវបានគេឃាត់ខ្លួនបាននៅក្នុងឆ្នាំ ២០២៤ និង កាត់ក្តីឱ្យជាប់ពន្ធធនាគារអស់មួយជីវិតនៅក្នុងឆ្នាំ ២០២៥ នេះ តែគេក៏នៅមានសិទ្ធិអាចប្តឹងទៅឧទ្ធរណ៍បាន៕
