ករណីរថយន្តក្រុងប្រភេទ ២ ជាន់ បានបើកបុកបង្កាន់ដៃស្ពានធ្លាក់ទឹក នៅចំណុចស្រុកសន្ទុក ខេត្តកំពង់ធំ នៅវេលាម៉ោង ៣ ទៀបភ្លឺ ថ្ងៃទី ២០ ខែវិច្ឆិកា ឆ្នាំ ២០២៥ នេះ បើតាមការអាប់ដែតព័ត៌មានថ្មីដែលទើបទទួលបាន បានបង្ហាញឱ្យឃើញថា មានជនរងគ្រោះ ១៣ នាក់បានបាត់បង់ជីវិត និង របួស ២៤ នាក់។
ទាក់ទិនទៅនឹងសោកនាដកម្មនឹកស្មានមិនដល់នេះ លោកឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំ បានបញ្ជាក់ប្រាប់សារព័ត៌មានក្នុងស្រុកឱ្យបានដឹងថា មកទល់ព្រឹកនេះ សមត្ថកិច្ចបានស្ទួចយកឡានចេញពីទឹក និង រកឃើញមនុស្សស្លាប់ចំនួន ១៣ នាក់ ក្នុងនេះមានស្រី ៨ នាក់ និង អ្នករបួស ២៤ នាក់ ខណៈបើផ្អែកតាមការសន្និដ្ឋានរបស់សមត្ថកិច្ចជំហ៊ានដំបូង គ្រោះថ្នាក់ចរាចរណ៍នេះ អាចបណ្ដាលមកពីអ្នកបើកស្ថិតក្នុងស្ថានភាពងងុយដេក។
ដោយឡែក បច្ចុប្បន្ននេះ សាកសពជនរងគ្រោះក្រោយស្រង់ពីទឹក ត្រូវបានកម្លាំងសមត្ថកិច្ចយកទៅតម្កល់នៅវត្តកកោះ ឃុំកកោះ ស្រុកសន្ទុក ដើម្បីស្រាវជ្រាវរកអត្តសញ្ញាណ និង ក្រុមគ្រួសារ៕
ប្រភព ៖ Fresh News
