អស់ពីរឿងមួយចូលរឿងមួយ! ក្រៅពីរឿង ថេណា ត្រូវហ្វេនចាប់ថើប ពេលនេះធ្លាក់ដល់អ្នកគ្រប់គ្រងលោករងពាក្យមិនសមរម្យម្ដង

ប៉ុន្មានថ្ងៃចុងក្រោយនេះ អ្នកលេងបណ្តាញសង្គមហ្វេសប៊ុក ជាពិសេស អ្នកគាំទ្រតារាចម្រៀងសំឡេងផ្អែមលោក ថេណា ច្បាស់ជាបានជ្រាបហើយពីការបង្ហាញវត្តមានក្នុងការសម្តែងលើឆាកតន្ត្រីជាបន្តបន្ទាប់ក្នុងកម្មវិធីជាច្រើនរបស់លោក។

ក្នុងនោះ ការបង្ហាញវត្តមានរបស់លោក ថេណា ប៉ុន្មានថ្ងៃនេះ កំពុងក្លាយទៅជាប្រធានបទចែករំលែកលើបណ្តាញសង្គមហ្វេសប៊ុកពីអ្នកគាំទ្រ ដោយរឿងទី ១ កាលពីថ្ងៃទី ០៥ ខែធ្នូ ឆ្នាំ ២០២៤ កន្លងទៅ ក្នុងការច្រៀងនៅឯផ្សារទំនើបអ៊ីអនម៉ល ភ្នំពេញ មានអ្នកគាំទ្រចាប់លោកថើបកណ្តាលហ្វូងមនុស្សជាច្រើន រហូតអ្នកគ្រប់គ្រងរបស់លោក ថេណា បានចេញមកបង្ហោះ Story ភ្លាមៗ ព្រោះទង្វើនេះអសីលធម៌ និង មិនគោរពសិទ្ធិគ្នាជាដើម។

ដោយឡែក កាលពីថ្ងៃទី ០៧ ខែធ្នូ ឆ្នាំ ២០២៤ កន្លងទៅ ក៏មានវីដេអូមួយរបស់លោក ថេណា មុននឹងការសម្តែងនៅឯផ្សារទំនើបជីបម៉ុង បានចែករំលែកដោយមានមនុស្សប៉ុន្មាននាក់បានដើរជាមួយលោក ប៉ុន្តែអ្វីដែលត្រូវបានអ្នកគាំទ្រចាប់អារម្មណ៍ គឺនារីម្នាក់នៅក្បែរលោក ថេណា។ ក្រោយឃើញវីដេអូមាននារីនៅក្បែរលោក ថេណា បែបនេះក៏មានមហាជនមួយចំនួនចូលទៅបញ្ចេញយោបល់សួរនាំថា «នារីរូបនោះជាអ្នកណា?» ហើយខ្លះទៀត បានប្រើពាក្យសម្ដីមិនសមរម្យចំពោះនារីរូបនោះទៀតផង។

យ៉ាងណាមិញ មិនបង្អង់យូរហ្វេនផេកផ្លូវការរបស់តារាចម្រៀង ថេណា បានចេញមកបកស្រាយ និង បញ្ជាក់យ៉ាងច្បាស់ថា នារីរូបនោះ គឺជាអ្នកគ្រប់គ្រងរបស់លោក ថេណា។ ជាងនេះទៅទៀត សារនោះក៏បានផ្តាំផ្ញើទៅកាន់អ្នកប្រើពាក្យមិនសមរម្យទៅកាន់អ្នកគ្រប់គ្រង លោក ថេណា ថា៖ «I’m here to talk about some comments on this video which viral in TikTok today. Admin ជឿថាហ្វេនមួយចំនួនធំរបស់បង ថេណា ប្រាកដជាស្គាល់ហើយ ថាបងស្រីដែលនៅក្នុងវីដេអូនេះជាអ្នកណា? ហ្នឹងហើយ គាត់ជា Manager របស់បង ថេណា។ ហើយ ថ្ងៃនេះ Admin លើករឿងមួយនេះឡើង គ្មានបំណងអ្វីក្រៅចង់ឱ្យអ្នកទាំងអស់គ្នា PLEASE RESPECT HER ព្រោះថា Comment មួយចំនួនពិតជាពិបាកនឹងស្តាប់ណាស់ ហើយនេះក៏មិនមែនជាលើកទី ១ ដែរ។ អ្នកទាំងអស់គ្នាជាហ្វេន គោរពស្រឡាញ់បង ថេណា ប៉ុន្តែកុំដល់ថ្នាក់ប្រើនូវពាក្យសម្តីមួយចំនួន ដែលធ្វើឱ្យប៉ះពាល់ដល់អារម្មណ៍អ្នកជុំវិញខ្លួនគាត់ ជាពិសេស Manager របស់គាត់ ដែលជាមនុស្សស្រី តើគាត់នឹងមានអារម្មណ៍យ៉ាងណា?? A REAL FAN NEVER DO LIKE THAT !! PLEASE STOP AND RESPECT EVERYONE . LOVE AND PEACE !!»៕