កាលពីថ្ងៃទី ០១ ខែឧសភា ឆ្នាំ ២០២៥ នាយកដ្ឋានប្រយុទ្ធប្រឆាំងជំងឺឆ្លងប្រចាំប្រទេសថៃ (DDC) បានប្រកាសរកឃើញមានករណីអ្នកស្លាប់ដោយជំងឺ Anthrax នៅខេត្ត Mukdahan ខណៈមនុស្សសរុប ២៤៧ នាក់ផ្សេងទៀតកំពុងស្ថិតក្រោមការតាមដាន។ ការផ្ទុះឆ្លងជំងឺមួយប្រភេទនេះដែរគឺដោយសារតែការញ៉ាំ និង ចែកចាយសាច់គោ អំឡុងពេលធ្វើពិធីបុណ្យសាសនាមួយ។
វេជ្ជបណ្ឌិត Phanumat Yannawetsakun អ្នកចាត់ការទូទៅនៃនាយកដ្ឋានប្រយុទ្ធប្រឆាំងជំងឺឆ្លងបានប្រកាសកាលពីថ្ងៃទី ០១ ខែឧសភា ឆ្នាំ ២០២៥ កន្លងទៅថា មានករណីមនុស្សស្លាប់ដោយសារជំងឺ Anthrax នៅខេត្ត Mukdahan។ អ្នកស្លាប់ជាបុរសវ័យ ៥៣ ឆ្នាំ មានមុខរបរជាកម្មករសំណង់ដែលមានជំងឺទឹកនោមផ្អែមប្រចាំកាយ។ តាមវេជ្ជបណ្ឌិតដដែលបានឱ្យដឹងទៀតថា អ្នកជំងឺបានកើតចេញដំបៅលើដៃខាងស្ដាំនៅថ្ងៃទី ២៤ ខែមេសា និង ត្រូវបានបញ្ជូនទៅព្យាបាលនៅមន្ទីរពេទ្យនៅថ្ងៃទី ២៧ ខែមេសា។ អាការរបស់គាត់កាន់តែអាក្រក់ទៅ ដំបៅប្រែទៅជាខ្មៅ កើតមានកូនកណ្ដុរនៅក្រោមក្លៀកខាងស្ដាំ សន្លប់ និង ប្រកាច់ មុនពេលលោកស្លាប់អំឡុងពេលទទួលការព្យាបាល។
ក្រុមគ្រូពេទ្យសង្ស័យថាអ្នកជំងឺស្លាប់ដោយជំងឺ Anthrax ទើបធ្វើការបញ្ជូនសំណាកទៅកាន់មន្ទីរពិសោធដើម្បីវិនិច្ឆ័យមើល ដោយលទ្ធផលទទួលបានមកគឺពិតជាជំងឺ Anthrax ពិតប្រាកដមែន។ តាមការស៊ើបអង្កេតដំបូង អ្នកជំងឺអាចឆ្លងជំងឺនេះក្រោយធ្វើការសម្លាប់គោដែលមានរោគពេលធ្វើពិធីសាសនា។ សាច់គោក៏ត្រូវបានចែកចាយបន្តឱ្យអ្នកក្នុងភូមិទទួលទាន។
ក្រោយស៊ើបអង្កេតលើករណីខាងលើ ខាងមន្ត្រីសុខាភិបាលក៏បានរកឃើញមនុស្សចំនួន ២៤៧ នាក់ផ្សេងទៀតអាចមានហានិភ័យឆ្លងដូចគ្នា ដោយក្នុងនោះ ២៨ នាក់ចូលរួមសម្លាប់គោជាមួយគ្នា ខណៈ ២១៩ នាក់ទៀតបានទទួលទានសាច់គោនោះទាំងឆៅ។ ក្រុមមនុស្សដែលប្រឈមហានិភ័យខ្ពស់គឺត្រូវបានផ្ដល់ថ្នាំអង់ទីប៊ីយូទិច និង នៅស្ថិតក្រោមការតាមដានពីក្រុមគ្រូពេទ្យ។
គួរបញ្ជាក់ថា ជំងឺ Anthrax គឺជាបង្កឡើងដោយបាក់តេរីឈ្មោះ Bacillus anthracis។ វាជាជំងឺឆ្លងពីសត្វមកមនុស្ស ដោយបាក់តេរីនេះអាចរស់រានក្នុងបរិយាកាសរាប់ឆ្នាំ។ សត្វដែលងាយឆ្លងជំងឺនេះជាងគេរួមមានពពួកសត្វគោ ក្របី ពពែ និង ចៀមជាដើម ដោយវាអាចចម្លងបន្តមកមនុស្សតាមរយៈការប៉ះពាល់ដោយផ្ទាល់ជាមួយសត្វមានជំងឺ ការទទួលទានសាច់ឆៅ ឬចម្អិនមិនបានល្អ។
ចំពោះរោគសញ្ញាវិញគឺអាចកើតមានឡើងក្នុងចន្លោះពី ១ ទៅ ៥ ថ្ងៃ ដោយអ្នកជំងឺអាចមានអាការក្ដៅខ្លួន ក្អួត ចុកពោះខ្លាំង មានដំបៅខ្មៅៗ និង ពិបាកដកដង្ហើម។ ជំងឺនេះដែរបើមិនទទួលបានការព្យាបាលទាន់ពេលវេលាទេនោះ អត្រានៃការស្លាប់គឺមានខ្ពស់រហូតដល់ទៅ ៨០%៕
ប្រភព៖ The Nation
