ទោះបីជាពេលនេះ ស្ថានការណ៍តាមបណ្ដាព្រំដែនកម្ពុជា-ថៃ បានធូរស្រាលឡើងវិញបន្តិច ក្រោយមានបទឈប់បាញ់ដោយគ្មានលក្ខខណ្ឌរវាងកម្ពុជា-ថៃ បានចូលជាធរមានបើគិតចាប់តាំងពី យប់ថ្ងៃទី ២៨ ខែកក្កដា ឆ្នាំ ២០២៥ វេលាម៉ោង ២៤:០០ ក្តី តែក្រឡេកទៅមើលស្ថានភាពជនភៀសសឹកឯណោះវិញ ក៏មិនទាន់បានវិលត្រឡប់ទៅកាន់ស្រុកភូមិកំណើតវិញនោះទេ។
ក្នុងការជម្លៀសខ្លួននោះដែរ បានធ្វើឱ្យមហាជនជាច្រើនស្រណោះយ៉ាងខ្លាំងដល់ប្រជាជនកម្ពុជា ដោយមានទាំងចាស់ជរា ស្ត្រីពពោះ ស្រ្តីទើបសម្រាលកូន ជាពិសេសនោះ គឺកុមារៗ ដែលត្រូវចាកចេញពីទីលំនៅទាំងខ្លះមិនទាន់យល់ថាអ្វីជាសង្គ្រាមនៅឡើយ។ ម្យ៉ាងវិញទៀត រយៈពេលនេះ កុមារជាច្រើនខកខានមិនបានទៅរៀនសូត្រថែមទៀត។
ស្របពេលជនភៀសសឹក មិនទាន់បានវិលត្រឡប់ចូលទៅផ្ទះសម្បែងវិញ ថ្មីៗនេះ មហាជនអ្នកលេងបណ្តាញសង្គមហ្វេសប៊ុកបានបង្ហាញអារម្មណ៍រីករាយ ក្រោយបានឃើញស្ថាបនិក ភ្លើងគប់ គឺកញ្ញា រិទ្ធី លំអរពេជ្រ បានដឹកនាំក្រុមការងារ និង ក្រុមសិល្បៈ «ពេទ្យសិល្បៈ» ទៅសម្តែងជូនដល់ជនភៀសសឹកនៅតាមតំបន់ជម្លៀសខ្លួនក្នុងខេត្តព្រះវិហារ ដើម្បីជាការបន្ថយការតានតឹងដល់ប្រជាជន ជាពិសេសនោះ គឺកុមារតូចៗតែម្តង។
ក្នុងនោះដែរ «ពេទ្យសិល្បៈ» រៀបចំដោយ ភ្លើងគុប គឺមានការចូលរួមពីសិល្បករសិល្បការិនីដូចជា កញ្ញា កេសរ , ក្រុមតួត្លុក លោក រិទ្ធ ដារ៉ូ, លោក មុំវណ្ណ ដាវីន, ម្ចាស់ពាន Cambodian Idol រដូវកាលទី ៥ លោក គី សាវីន និង សិល្បករ តន្ត្រីករបុរាណសម័យជាច្រើនទៀត។ លើសពីនោះ ក្រៅពីការសម្តែងរបស់ «ពេទ្យសិល្បៈ» ហើយនោះ ក៏មានការរៀបចំស្បៀងខ្លះៗជូនដល់ជនភៀសសឹក និង សម្ភារដល់កុមារតូចៗ ដូចជាតុក្កតា ទឹកដោះគោ ចំណីក្មេង ដើម្បីឱ្យពួកគេមានអារម្មណ៍បាត់ភាពភ័យខ្លាច ទទួលបានភាពកក់ក្តៅត្រលប់មកវិញ៕
