នៅថ្ងៃទី ២១ វិច្ឆិកា នេះ កម្មវិធីប្រកួតសម្រស់លំដាប់ពិភពលោក Miss Universe 2025 បានរកឃើញរាជិនីគ្រងមកុដថ្មីសម្រាប់ឆ្នាំ ២០២៥ ហើយ គឺបានទៅលើបវរកញ្ញាមកពីប្រទេស ម៉ិកស៊ិក។
ដោយឡែក បើក្រឡេកទៅមើលមុនកម្មវិធីប្រកួតបវរកញ្ញាលំដាប់ពិភពលោក Miss Universe 2025 នេះ ឈានដល់វគ្គផ្ដាច់ព្រ័ត្រ ក៏មានគណៈកម្មការចំនួន ២ រូប បានប្រកាសដើរចេញភ្លាមៗ ដោយមូលហេតុខាងគណៈកម្មការម្នាក់អះអាងថា បេក្ខភាពជាប់ Top 30 គឺត្រូវបានគេជ្រើសរើសមុនរួចទៅហើយដោយគណៈកម្មការមិនផ្លូវការ។
កាលពីថ្ងៃទី ១៨ ខែវិច្ឆិកា ឆ្នាំ ២០២៥ កន្លងទៅ តន្ត្រីករ Omar Harfouch បានបង្កការភ្ញាក់ផ្អើល ដោយលោកបានបង្ហោះលើ Story IG របស់ខ្លួន ប្រកាសពីការដកខ្លួនចេញពីតំណែងគណៈកម្មការ Miss Universe 2025 រួមទាំងបង្ហាញការច្របូកច្របល់ចិត្ត និង បារម្ភ ពាក់ព័ន្ធនឹងបេក្ខភាព Top 30 ដែលបានជ្រើសរើស។
លោក Harfouch បានលើកឡើងថា លោកពិតជាមានការទើសចិត្ត និង បារម្ភជាខ្លាំង ក្រោយលោករកឃើញថា កម្មវិធីប្រកួតបវរកញ្ញានេះ មានគណៈកម្មការចាប់ដាក់មិនផ្លូវការដែលបានរៀបចំជ្រើសរើស Top 30 ពីបណ្ដាបេក្ខភាពទាំង ១៣៦ ប្រទេស។ លោកបានដឹងព័ត៌មាននេះតាមបណ្ដាញសង្គម ហើយអះអាងទៀតថា គណៈកម្មការទាំង ៨ នាក់ពិតប្រាកដ គឺគ្មានវត្តមានក្នុងពេលជ្រើសរើសនោះឡើយ ហើយលទ្ធផលនៃការជ្រើសរើសនោះ បច្ចុប្បន្នគឺនៅរក្សាជាអាថ៌កំបាំងនៅឡើយ។
ជាមួយគ្នានោះ លើការបង្ហោះមួយទៀត លោក Omar Harfouch បានលើកឡើងថា ក្រុមគណៈកម្មការមិនផ្លូវការទាំងនោះគឺរួមមានទាំងអ្នកដែលមានទំនាក់ទំនងស្គាល់គ្នាជាមួយបេក្ខភាពពីប្រទេសមួយចំនួន អ្នកដែលទទួលខុសត្រូវលើការរាប់ vote និង គ្រប់គ្រងលើលទ្ធផលផងដែរ។ ទាំងនេះហើយ គឺធ្វើឱ្យខ្វះតម្លាភាព អាចបង្កើតទៅជាជម្លោះផលប្រយោជន៍។
លោក Harfouch បានអះអាងបន្ទាប់ទៀតថា លោកបានទៅនិយាយជាមួយខាង Miss Universe committee ពាក់ព័ន្ធនឹងការមិនយល់ស្របរបស់លោកចំពោះការជ្រើសរើសបេក្ខភាព Top 30 ព្រោះតែគ្មានការចូលរួមពីគណៈកម្មការផ្លូវការទាំង ៨ រូប រួមទាំងលោកផងដែរ។ យ៉ាងណាមិញ ក្រោយមក ខាងនោះបានប្រញាប់ទៅចេញបញ្ជីរាយនាមអ្នកដែលពាក់ព័ន្ធក្នុងដំណើរការជ្រើសរើសបេក្ខភាពលើផេក IG របស់ពួកគេ ដោយគ្មានបញ្ជាក់ពីតួនាទីឱ្យច្បាស់ៗនៃបុគ្គលទាំងនោះ ដែលកាន់តែធ្វើឱ្យមានភាពច្របូកច្របល់លើសដើម។
ចុងបញ្ចប់ លោកក៏បានប្រកាសពីការចាកចេញរបស់ខ្លួនពីកម្មវិធីប្រកួតមួយនេះ ដោយសំណេររបស់លោក Harfouch បានរៀបរាប់ថា៖ «ក្រោយការសន្ទនាដោយគ្មានការគោរពជាមួយលោកប្រធាន Raul Rocha ជុំវិញការខ្វះតម្លាភាពលើដំណើរការជ្រើសរើសបេក្ខភាពក្នុងកម្មវិធី Miss Universe នេះ ខ្ញុំបានសម្រេចចិត្តលាលែងឈប់ធ្វើជាគណៈកម្មការ និង មិនចូលរួមក្នុងកម្មវិធីនេះទៀតទេ។ ខ្ញុំក៏នឹងមិនធ្វើការលេងតន្ត្រីនៅកម្មវិធីនោះដែរ»។
ដោយឡែក ចំពោះអតីតកីឡាករបាល់ទាត់ Claude Makelele ដែលជាគណៈកម្មការមួយរូបដែរក្នុងកម្មវិធីប្រកួត Miss Universe នេះ ក៏បានចេញមុខមកប្រកាសពីការចាកចេញរបស់លោកដូចគ្នា ប៉ុន្តែលោកមិនបានប្រាប់ពីមូលហេតុនៃការចាកចេញមួយនេះឡើយ៕
