កន្លងទៅប៉ុន្មានថ្ងៃមុន កម្មវិធីបង្ហាញម៉ូដហ្វេហ្សិនមួយក្រោមប្រធានបទ AI COUTURE: THE FUTURE RUNWAY បានបង្ហាញសម្លៀកបំពាក់ដ៏ពិសេស ជាឈុតបែប COUTURE ក្នុងទំនោរអនាគតកាល ដែលបានធ្វើឱ្យផ្ទុះការចាប់អារម្មណ៍ខ្លាំង ទាំងអ្នកក្នុងពិភពហ្វេហ្សិននៅកម្ពុជា និង ភ្ញៀវបរទេស។
ខូឡិកហ្សិនបានមកជាមួយឈុតបុរស និង នារី ដែលពីមួយឈុតទៅមួយឈុតពិតជាប្លែក មើលមកហ្វេហ្សិន និង ទាក់ទាញបំផុត។ អ្នកច្នៃម៉ូដបានរចនាដោយផ្តោតប្រើពណ៌ស ខ្មៅ ប្រាក់ និង ខៀវ ហើយភាគច្រើនសាច់ក្រណាត់បែបស្បែកភ្លឺរលោង។
ក្រឡេកមកម៉ូដសម្លៀកបំពាក់វិញ ទំនោរមានលក្ខណៈអនាគតកាល ជាហ្វេហ្សិនលំដាប់ខ្ពស់ បង្ហាញពីភាពខ្លាំង និង ភាពច្នៃប្រឌិតលើសពីធម្មតា។ អ្នកច្នៃម៉ូដពិតជាជំនាញក្នុងការលម្អិត រាប់តាំងពីការដេរ ការចាប់ម៉ូដ រហូតដល់បច្ចេកទេសដំឡើង សូម្បីតែឈុតប្រើក្រណាត់ប៉ោងបែបភួយ ក៏ដេរឡើងម៉ូដ ចេញរាងឥតខ្ចោះផងដែរ។
តាមការបង្ហោះនៅលើហ្វេសប៊ុក ខូឡិកហ្សិននេះត្រូវបានច្នៃម៉ូដដោយ លោក សំរឹទ្ធ ពុទ្ធិសិដ្ឋ ដែលគេស្គាល់ថា ជាអ្នកច្នៃម៉ូដមានទេពកោសល្យខ្ពស់ ក្នុងការដំឡើងឈុតធំៗ និង ហ្វេហ្សិនខ្លាំង។ លោកក៏ត្រូវបានគេស្គាល់ថាជា កូនក្រុមរាំ និង ជាអ្នកច្នៃម៉ូដផ្ទាល់របស់ កញ្ញា សួស វីហ្សា។ សម្រាប់កម្មវិធីដើរបង្ហាញម៉ូដនេះ គឺជាឆាក Fashion Show លើកដំបូងរបស់លោក ដែលទើបបានធ្វើឡើងកាលពីថ្ងៃទី ៣០ ខែ មីនា ឆ្នាំ ២០២៥ នៅឯទីតាំង The Elysée កោះពេជ្រ៕
