នៅព្រឹកម៉ោង ១១ ព្រឹកថ្ងៃទី ១ ខែសីហា ឆ្នាំ ២០២៥ នេះ ទាហានកម្ពុជាចំនួន ២ រូប ត្រូវបានភាគីថៃប្រគល់ត្រឡប់មកវិញហើយ នៅច្រកទ្វារព្រំដែនអន្ដរជាតិអូរស្មាច់ ខេត្តឧត្តរមានជ័យ។
ទាហានដែលត្រូវបានបញ្ជូនមកកម្ពុជា ទាំង ២ នាក់ រួមមាន អនុសេនីយ៍ត្រី អាង អឿង អាយុ ៣៧ ឆ្នាំ និង ពលបាលឯក ម៉ម វុទ្ធី អាយុ ៥៣ ឆ្នាំ ខណៈទាហានទាំង ២ នាក់ ត្រូវបានបញ្ជូនត្រឡប់មកវិញ ខុសប្រក្រតីដោយមានម្នាក់រងរបួសអង្គុយលើរទេះរុញ និង ម្នាក់ទៀតបានភ្លេចភ្លាំងស្មារតី និង ត្រូវបានកងកម្លាំងជំនាញ និង គ្រូពេទ្យយើងបញ្ជូនទៅសង្គ្រោះបន្ទាន់ភ្លាមៗ។
យ៉ាងណាមិញ ក្រោយឃើញស្ថានភាពរបស់ទាហានកម្ពុជាទាំង ២ រូបហើយ ប្រជាជនខ្មែរទាំងមូលបានបង្ហាញនូវភាពក្តុកក្តួល ខ្លោចចិត្តអាណិតដល់ទាហានខ្មែរយើងទាំង ២ រូបយ៉ាងខ្លាំង។
ងាកទៅកាន់ លោក ហេង វិសាល ក្រោយដុតដៃដុតជើងខ្នះខ្នែងក្នុងការបញ្ជូនស្បៀងទៅកាន់កងកម្លាំង និង ជនភៀសសឹកហើយនោះ នៅរសៀលថ្ងៃទី ០១ ខែសីហា នេះ លោកបានប្រកាសឧត្ថម្ភប្រាក់ ១០០ ដុល្លារ ក្នុងមួយខែ ពេញមួយជីវិតជូនដល់ទាហានទាំង ២ រូប។
លោក ហេង វិសាល បានរៀបរាប់ថា៖ «ពេលដែលបានឃើញព័ត៌មាននេះហើយ ខ្ញុំ និង ក្រុមគ្រួសារពិតជាមិនអាចទទួលយកបានទេ ខ្ញុំពិតជាឈឺចាប់ខ្លាំងណាស់ ម្នាក់ពិការ ម្នាក់មានបញ្ហាស្មារតី តើអនាគតពួកគាត់នឹងទៅជាយ៉ាងណាទៅ? ខ្ញុំ និងគ្រួសារសម្រេចចិត្តថានឹងប្រើលុយផ្ទាល់ខ្លួន ឧបត្ថម្ភពួកគាត់ម្នាក់ ១០០$ ជារៀងរាល់ខែ រយៈពេលពេញមួយជីវិត»៕
