ស្អាតត្រជាក់ភ្នែកណាស់! Rick KH រៀបចំបណ្ណាល័យយ៉ាងប្រណីត មានទាំងថ្នាក់កុំព្យូទ័រទៀត បើកឱ្យភ្ញៀវចូលរៀនឥតគិតថ្លៃ

ជាការពិតណាស់ មហាជននិយមតាមដានយុវជន Rick KH ឬ គោប្រាក់ ច្បាស់ជាបានជ្រាប និង សរសើររួចមកហើយនូវសកម្មភាពកន្លងមករបស់លោក ដែលតែងតែជួយដល់សង្គម ជាពិសេស គឺការចែករំលែកនូវចំណេះដឹងទូទៅផ្សេងៗផងនោះ។

យ៉ាងណាមិញ កាលពីពេលថ្មីៗ លោក Rick KH ក៏បានប្រកាសរៀបចំបណ្ណាល័យនៅក្នុងទឹកដីខេត្តសៀមរាប និង បើកឱ្យចូលដោយឥតគិតថ្លៃនោះ ពេលនេះជិតរួចរាល់ជាស្ថាពរហើយ។

ក្នុងនោះ អ្វីដែលគួរឱ្យចាប់អារម្មណ៍ក្រោយពីបានឃើញលោក Rick KH បានបង្ហោះទិដ្ឋភាពមួយចំនួនក្នុងបណ្ណាល័យរបស់លោកនោះ គឺពិតជាស្អាតប្រណីតណាស់។ ជាងនេះទៅទៀត អ្វីកាន់តែធ្វើឱ្យគ្រប់គ្នាស្រែកវ៉ាវនោះ ព្រោះការដេគ័របណ្ណាល័យរបស់កូនខ្មែរខាងលើ ដូចទៅនឹងរឿង Harry Potter ក៏ដូចជាបណ្ណាល័យនៅក្រៅប្រទេសមួយចំនួនទៀតផង។

ម្យ៉ាងវិញទៀត មិនត្រឹមតែបើកបណ្ណាល័យឱ្យមហាជនចូលអានសៀវភៅដោយឥតគិតថ្លៃនោះទេ លោក Rick KH ក៏បានដាក់កំព្យូទ័របន្ថែម ដោយលោកបានបញ្ជាក់ថា៖ «មួយរយៈនេះរវល់ដើម្បី បណ្ណាល័យ – គោប្រាក់ ប្តូររូបរាងថ្មីជាមួយនឹងសៀវភៅសរុប ៩,៥៥៤ ក្បាល បន្ថែមការស្រាវជ្រាវ និង ថ្នាក់សិក្សាកុំព្យូរទ័រ ២០ គ្រឿងក្នុងពេលឆាប់ៗ អាចមកអានបានដោយឥតគិតថ្លៃ។ រូបពិតមិនមែន AI»៕