នៅព្រឹកថ្ងៃទី ២០ ខែតុលា ឆ្នាំ ២០២៥ នេះ វេលាម៉ោងប្រមាណ ៩ ព្រឹក មានករណីបុរសជនជាតិបរទេសម្នាក់ ត្រូវប៉ូលិសនៅក្រុងផាតាយ៉ា ប្រទេសថៃ ចាប់ខ្លួន ក្រោយដើរស្រាតននលគកតាមដងផ្លូវ បុកម៉ូតូបុកឡាន លើកដៃឡើងស្រែកសូត្រធម៌ដាក់ព្រះអាទិត្យ ផ្អើលអស់អ្នកដំណើរតាមដងផ្លូវ។
បុរសខាងលើ ត្រូវគេប្រទះឃើញដើរនៅចំណុចផ្លូវប្រសព្វ South Pattaya 2 ឈរលាតដៃ ភ្នែកសម្លឹងមើលព្រះអាទិត្យ រួចចាប់ផ្ដើមសូត្រធម៌ ទាំងខ្លួនននលគក រហូតអ្នកដំណើរទាក់ទងឱ្យប៉ូលិសចុះមកអន្តរាគមន៍ភ្លាមៗ។ ប៉ូលិសបានទៅដល់ទីតាំង ចាប់ទាញបុរសបរទេសនោះចេញពីផ្លូវ។
តាមការបញ្ជាក់របស់មន្ត្រីប៉ូលិសនៅផាតាយ៉ា ការសន្និដ្ឋានដំបូងគឺសង្ស័យថាបុរសរូបនោះលេងថ្នាំរហូតបែកថ្នាំនិយាយលែងដឹងខុសត្រូវ។ ក្រោយការចាប់ខ្លួន បុរសនោះក៏ត្រូវបានបញ្ជូនបន្តទៅកាន់មន្ទីរពេទ្យ Pattaya Memorial Hospital ដើម្បីពិនិត្យមើលសុខភាព៕
ប្រភព៖ Khaosod English
