ជាមនុស្សស្រី នៅពេលចូលដល់វ័យ ២៥ ឆ្នាំឡើង ភាគច្រើនកំពុងមានគូស្រករ ឬកសាងគ្រួសារ។ តែយ៉ាងណាមិញ ស្ត្រីវ័យនេះមួយចំនួន ក៏កំពុងនៅទំនេរ ដោយហេតុពួកគេមានអត្តចរិត ដែលបុរសមិនចង់ក្បែរ។ ដូច្នេះ បើមិនចង់មានឈ្មោះជាក្រមុំចាស់ គួរកាត់ចោលអត្តចរិត ៦ នេះចេញ។
១. រំពឹងហួសប្រមាណ
ការរំពឹងខ្ពស់ចង់បានដៃគូទៅលើរូបសម្រស់ ទ្រព្យសម្បត្តិ ឬបុគ្គលិកលក្ខណៈល្អគ្រប់ដល់ អាចធ្វើឱ្យពិបាកក្នុងការជួបនរណាម្នាក់ដែលត្រូវចិត្ត។ ចងចាំថា គ្មាននរណាម្នាក់ ដែលល្អឥតខ្ចោះនោះទេ គួរផ្តោតទៅលើស្នូលតម្លៃរបស់មនុស្ស ដូចជា មានទឹកចិត្ត ចេះគោរព ឱ្យតម្លៃ និង ចែករំលែកគោលដៅជាមួយគ្នា។
២. ខ្វះទំនុកចិត្ត
ខ្សោយទំនុកចិត្តលើខ្លួនឯង ឬគ្មានភាពជឿជាក់លើខ្លួនឯង អាចធ្វើឱ្យពិបាកក្នុងការទាក់ទាញដៃគូ ឬរក្សាទំនាក់ទំនងល្អ។ គួរដឹងថា ទំនុកចិត្តគឺជាថាមពលមួយ ដែលធ្វើឱ្យអ្នកមើលមកទាក់ទាញ បង្កើតទំនាក់ទំនងមានប្រសិទ្ធភាព និង កសាងការគោរពគ្នាទៅវិញទៅមក។ ដើម្បីបង្កើនទំនុកចិត្ត ត្រូវអនុវត្តការស្រលាញ់ខ្លួនឯង ទទួលយកអ្វីដែលជាខ្លួនឯង គួបផ្សំនឹងធ្វើអ្វីតាមចំណូលចិត្ត កំណត់គោលដៅផ្ទាល់ខ្លួន និង នៅជិតមនុស្សដែលគាំទ្រអ្នក។
៣. ពឹងផ្អែកលើដៃគូទាំងស្រុង
មនុស្សស្រីដែលពឹងផ្អែកដៃគូទាំងស្រុង មិនថា អារម្មណ៍ ហិរញ្ញវត្ថុ ឬការបង្កើតការសម្រេចចិត្ត អាចបង្កើតជាទំនាក់ទំនងគ្មានតុល្យភាព។ ពឹងផ្អែកម្តងជាពីរដងមិនជាថ្វី តែបើច្រើនដងដដែលៗ វានឹងធ្វើឱ្យបុរសដៃគូធុញថប់ និង មានអារម្មណ៍លើសលប់។
៤. ពូកែរិះគន់
ចូលចិត្តរិះគន់ដៃគូ ថាដៃគូមិនស្មើខ្លួន ឬមិនល្អឥតខ្ចោះ អាចធ្វើឱ្យបុរសមានអារម្មណ៍ថាខ្លួនអស់តម្លៃ ហើយវានឹងបំពុលទំនាក់ទំនង។ ជាការពិតដៃគូនឹងមិនចង់នៅជិតនរណា ដែលគិតថាគេមិនល្អគ្រប់គ្រាន់នោះទេ។
៥. ចរិតហាយសូរ
នៅពេលបង្ហាញចង់បានអ្វីដែលលំដាប់ខ្ពស់ដូចជា សម្ភារនិយម រស់នៅបែបប្រណីត លំដាប់ខ្ពស់ ឬចាយលុយដើម្បីភាពអស្ចារ្យ បុរសនឹងមានអារម្មណ៍ថា មនុស្សស្រីឱ្យតម្លៃតែលើអ្វីអស់ទាំងនោះ ជាជាងឱ្យតម្លៃរូបគេ។
៦. គិតតែពីអារម្មណ៍ខ្លួនឯង
បើចូលចិត្តជះអារម្មណ៍លើដៃគូ គិតតែពីអារម្មណ៍ខ្លួនឯង វានឹងធ្វើឱ្យទំនាក់ទំនងគ្មានភាពស្និទ្ធស្នាល និង ឆ្ងាយ។ បើចង់រក្សាបានគង់វង្ស គួរបើកចិត្ត ចែករំលែកការគិត និង អារម្មណ៍គ្នាទៅវិញទៅមក៕
